میرِ کارواں: قائدِ اعظم - سیماب اکبرآبادی

[حسان خان]

تُو لے کے ساتھ قافلہ اپنا ہوا رواں
ہو اک قدم زمین ترا، ایک آسماں
اے میرِ کارواں

گم گشتگانِ قوم کا رہبر کہیں تجھے
یا رحمتِ مجسمِ داور کہیں تجھے
جہد و عمل کا کیوں نہ پیمبر کہیں تجھے
تو پُرشباب اور تری روح ہے جواں
اے میرِ کارواں

مدت سے منتظر تھے صدائے دِرا کے ہم
تھے وقفِ انتطار تری لَو لگا کے ہم
لا چوم لیں نشان ترے نقشِ پا کے ہم
تو دفعتاً حجابِ نظر سے ہوا عیاں
اے میرِ کارواں

اب چاہے ذرے ذرے سے حشرِ ستم اٹھے
راہِ وطن میں شان سے تیرا عَلَم اٹھے
ہاں بعدِ فکر و غور اٹھے، جو قدم اٹھے
پُرخوف و پُرخطر ہے گذرگاہِ امتحاں
اے میرِ کارواں

افراد کی مخالفتوں سے خفا نہ ہو
ہوتا نہیں جو ساتھ کوئی بے وفا، نہ ہو
مرکز سے اپنے تیرا تصور جدا نہ ہو
دنیا کو کھینچ لے گا ترا جذبۂ نہاں
اے میرِ کارواں

دشواریوں کے مرحلے، مشکل کے سامنے
کچھ بھی نہیں ارادۂ کامل کے سامنے
اب موت بھی جو آئے تو منزل کے سامنے
للہ کسلِ راہ سے ہونا نہ سرگراں
اے میرِ کارواں

ہے سارا ملک تیری نوا پر مٹا ہوا
تُو ہے توجہات کا مرکز بنا ہوا
ہر راہبر ہے آج نظر سے گرا ہوا
اب صرف تیرا نام ہے عنوانِ داستاں
اے میرِ کارواں

منزل سے تجھ کو عشق ہے اے پائے مردِ عشق
آئیں گے ترے بعد کئی رہ نوردِ عشق
اک عمر چاہیے کہ گوارا ہو دردِ عشق
"رکھی ہے آج لذتِ زخمِ جگر کہاں"
اے میرِ کارواں

(سیماب اکبرآبادی)
۱۹۴۷ء​