بابا بلھے شاہ مینوں سکھ دا سنیہڑا توں جھب لیاویں وے ۔ بلھے شاہ

[فرخ منظور]

مینوں سکھ دا سنیہڑا توں جھب لیاویں وے
پاندھیا ہو
میں کبڑی میں دبڑی ہوئی آں
میرے سبھ دکھڑے بتلاویں وے
پاندھیا ہو
کھلیاں لٹاں گل دست پراندا
ایہہ گل آکھیں، نہ شرمائیں وے
پاندھیا ہو
اک لکھ دیندی میں دو لکھ دیساں
مینوں پیارا آن ملاویں وے
یاراں لکھ کتابت بھیجی
کِتے گوشے بہہ سمجھاویں وے
پاندھیا ہو
بلھا شوہ دیاں مڑن مہاراں
لکھ پتیاں توں جھب دھاویں وے
پاندھیا ہو
مینوں سکھ دا سنیہڑا توں جھب لیاویں وے
پاندھیا ہو

(بلھے شاہ)