نذر ِ جون ایلیا

[رامش عثمانی]

چَشم ِ نم بے خواب ہے ہر پیرہن بے رنگ ہے
جون تیرے بعد یہ شہر ِ سخن بے رنگ ہے

کس سے پوچھوں حرف اور معنی کے رشتہ ہائے نو
کیا نیا لکھوں کہ میرا بانکپن بے رنگ ہے

اب غبار ِ رنگ پر افشاں فضا میں ہو تو کیا
جو سراپا رنگ تھا اس کا کفن بے رنگ ہے

بے حسی کی گرد میں اب کون دیکھے گا غزال
فرق کس کو پڑ رہا ہے گر ، ختن بے رنگ ہے

کون سمجھے گا کہ تجھ کو خود سے کیا پرخاش تھی
ہائے اب وہ رزم گاہ ِ جان و تن بے رنگ ہے