نشانِ منزلِ من مجھ میں جلوہ گر ہے تو

[ظہیراحمدظہیر]

نشانِ منزلِ من مجھ میں جلوہ گر ہے تو
مجھے خبر ہی نہیں تھی کہ ہمسفر ہے تو

سفالِ کوزہء جاں ! دستِ مہر و الفت پر
تجھے گدائی میں رکھوں تو معتبر ہے تو​

علاجِ زخمِ تمنا نے مجھ کو ماردیا
کسی کو کیسے بتاؤں کہ چارہ گر ہے تو

چراغِ بامِ تماشہ کو بس بجھادے اب
میں جس مقام پہ بیٹھا ہوں باخبر ہے تو​

یہ کس گمان میں لڑتا ہے تو حقیقت سے
یہ کس خیال کے عالم میں گم نظر ہے تو

ترے قدم سے بندھے ہیں ترے زما ن و مکاں
تجھے مقیم سمجھتا تھا دربدر ہے تو

ابھی تو قضیہء نان و نمک نہیں نبٹا
ابھی سے پائے تمنا کدھر کدھر ہے تو

تری جڑیں کسی مٹی کو ڈھونڈتی ہیں ظہیر
زمینِ زر میں ابھی تک جو بے ثمر ہے تو

ظہیر احمد ظہیر ۔۔۔۔۔۔۔۔۔۔فروری ۲۰۱۱
ٹیگ: محمد تابش صدیقی سید عاطف علی فاتح کاشف اختر​

 

[محمد تابش صدیقی]

ابھی تو قضیہء نان و نمک نہیں نبٹا
ابھی سے پائے تمنا کدھر کدھر ہے تو

کیا خوب حقیقت بیان کی ہے۔