نشترِ یاس - پنڈت برج نرائن چکبست

[حسان خان]

مصنف کے ایک نوجوان عزیز نے، جس کا نام تیج نرائن چکبست تھا، عالمِ جنون میں خودکشی کر لی تھی۔ اُس کی وفات پر یہ نظم کہی گئی تھی۔​

​

نہ اعتبار سہی اس حیاتِ فانی کا​

مگر امید سے ہے لطف زندگانی کا​

پیامِ مرگ ہے غم یاسِ جاودانی کا​

شباب روح کا ہے حوصلہ جوانی کا​

بشر کا دل نہ ہو زندہ تو آب و گل کیا ہے​

فقط طلسم امیدوں کا ہے یہ دل کیا ہے​

​

شہیدِ یاس چلا دل پہ تیرے کون خدنگ​

تڑپ کے خاک ہوئی دل میں کون دل کی امنگ​

کہ جس سے رنگ طبیعت کا ہو گیا بے رنگ​

ہوا ترانۂ ہستی کا ساز بے آہنگ​

بنا حیات کا ارمان آبلہ دل کا​

لٹا شباب کی منزل میں قافلہ دل کا​

​

کھلا نہ راز طبیعت کی بے قراری کا​

زباں کو پاس رہا دل کی پردہ داری کا​

جنوں میں ہوش رہا ضبطِ آہ و زاری کا​

نشاں طبیب نے پایا نہ زخمِ کاری کا​

کسی نے بھی نہ طبیعت کا یہ فسوں سمجھا​

کوئی سَنَک کوئی سودا کوئی جنوں سمجھا​

​

زباں کی طرح ہے رگ رگ سے یہ صدا جاری​

طبیب کھو نہ سکا زندگی کی بیماری​

ہے تیری نعش پہ بھی عالمِ جنوں طاری​

کفن پہ چار طرف ہے لہو سے گُل کاری​

ستم کشوں کے لیے طرفہ یادگار ہے یہ​

ترے شباب کی بس آخری بہار ہے یہ​

​

جب اپنی جا سے ابلتا ہے چشمۂ کہسار​

قدم قدم پہ دکھاتا ہے جوش کی رفتار​

مگر جو راہ میں حائل ہو پتھروں کا فشار​

تو یوں بکھرتا ہے قطروں میں جیسے اشک کا تار​

شباب یوں ہی لٹا بے کسی کے بسمل کا​

ستم ہے جوشِ جوانی میں ٹوٹنا دل کا​

​

دعائیں دیتے تھے جس گود میں کھلا کے تجھے​

اُسی میں آج سلایا کفن پنھا کے تجھے​

گناہگار ہوئے لکھنؤ میں لا کے تجھے​

خموش بیٹھے ہیں اب خاک میں ملا کے تجھے​

دعا کا غم نہ دوا کی ہے جستجو باقی​

جو دل میں ہے تو ہے مرنے کی آرزو باقی​

​

جو دل کو توڑ دے وہ ماتمِ شباب ہے یہ​

جو اپنی جان پہ رہتا ہے وہ عتاب ہے یہ​

جو عمر بھر رہے وہ بے کسی کا خواب ہے یہ​

کسی غریب کی ہستی کا انقلاب ہے یہ​

جو دل میں دردِ محبت تھا آج داغ ہوا​

چِتا کی آگ سے روشن یہی چراغ ہوا​

​

جہاں میں دیکھے ہیں ایسے بھی خوش نصیب شجر​

سِدھارتے ہیں جو گلشن سے پھول کر، پھل کر​

نظر سے گذرے ہیں ایسے بھی نخل بار آور​

جو سوکھ جاتے ہیں فصلِ بہار میں آ کر​

مگر بہار و خزاں تھی نہ اس شجر کے لیے​

زمیں سے اس نے اٹھایا تھا سر تبر کے لیے​

​

(پنڈت برج نرائن چکبست)​

۱۹۱۵ء​