نظارہ تھا اک اور ہی منظر سے نکل کر - رشید ندیم

[فرخ منظور]

نظارہ تھا اک اور ہی منظر سے نکل کر
دیکھا جو سمندر کو سمندر سے نکل کر

پھرتا تھا کہیں خواب خلاؤں میں اکیلا
میں گردشِ افلاک کے محور سے نکل کر

اب یاد نہیں رہتی مجھے وقت کی گنتی
نسیاں میں پڑا رہتا ہوں ازبر سے نکل کر

کھو جاؤں گا اِک روز کسی خوابِ ابد میں
لیٹوں گا کفِ خاک پہ بستر سے نکل کر

لذّت کشِ خمیازہ ہوں اے حسرتِ نایافت
نایاب میں رہتا ہوں میّسر سے نکل کر

پھر رقص میں ہے حرفِ برہنہ سرِ محفل
پابندیِ آداب کی چادر سے نکل کر

گونجا ہے ندیم اب کے بڑے زور سے سر میں
اِک شورِ تمنّا دلِ خود سر سے نکل کر

(رشید ندیم)

 

[پیاسا صحرا]

اب یاد نہیں رہتی مجھے وقت کی گنتی
نسیاں میں پڑا رہتا ہوں ازبر سے نکل کر
(رشید ندیم)

بہت خوب شعر ھے جی ۔ مجھے تو جانِ غزل لگا ھے یہ شعر ۔
شکریہ بہت خوب انتخاب کیا ھے آپ نے ۔

 

[فرخ منظور]

بہت خوب شعر ھے جی ۔ مجھے تو جانِ غزل لگا ھے یہ شعر ۔
شکریہ بہت خوب انتخاب کیا ھے آپ نے ۔

بہت شکریہ پیاسا صحرا !