نظم برائے اصلاح (عنوان:وقت)

[منذر رضا]

السلام علیکم، اساتذہ سے اصلاح کی درخواست ہے
الف عین
یاسر شاہ محمد تابش صدیقی محمد خلیل الرحمٰن سید عاطف علی فلسفی

نظم:وقت
رات بھی گزر گئی
اور دن بھی مٹ گیا
اب یہ وہ مقام ہے
جس مقامِ یاس پر
صبح ہے نہ شام ہے
دن ہے اور نہ رات ہے
وقت سے کوئی گماں
اب مجھے نہیں رہا
بلکہ اب مرے لیے
ایک سی ہے ہر گھڑی
ہر گھڑی وہی فغاں
آہ اور سسکیاں
وقت سے نہ بھر سکے
میرے زخم ہائے دل
وقت کا میں کیا کروں
وقت میرا کیا کرے
وقت کچھ نہ کر سکا
درد ویسا ہی رہا
رات بھی سیاہ رہی
دن بھی زرد ہی رہے
ماہتاب بھی بجھا
آفتاب بھی چھپا
اب مجھے پتا نہیں
رات کس کو کہتے ہیں
دن ہے کس بلا کا نام
اب مجھے پتا نہیں
کیا بجا ہے کیا نہیں
کیونکہ میرے واسطے
وقت کوئی شے نہیں!!!

شکریہ!

 

[سید عاطف علی]

اب یہ وہ مقام ہے

اب تو وہ مقام ہے

ایک سی ہے ہر گھڑی

ہر گھڑی ہے ایک سی

آہ اور سسکیاں

آہیں اور سسکیاں

ماہتاب بھی بجھا
آفتاب بھی چھپا

آفتاب کے لیے بجھنا اور ماہتاب کے لیے چھپنا کر لیں تو بہتر ہو گا،

 

[منذر رضا]

جی سید عاطف علی صاحب، میں نے نوٹ کر لیا، اصل مراسلے میں تدوین نہیں کر رہا کہ اس کام سے مجھے منع کیا جا چکا ہے، تاہم میں اپنے پاس تصحیح کر لیتا ہوں۔
اصلاح کے لیے شکر گزار ہوں، تہِ دل سے!

 

[عظیم]

مزید
رات بھی سیاہ رہی
میں 'سیاہ' سیہ تقطیع ہو رہا ہے

 

[منذر رضا]

عظیم
سید عاطف علی
رات بھی سیہ رہی
اب سہی ہے؟؟؟

 

[عظیم]

عظیم
سید عاطف علی
رات بھی سیہ رہی
اب سہی ہے؟؟؟

رات بھی رہی سیاہ
کیسا رہے گا ؟
اس کے علاوہ عاطف بھائی نے
آہیں اور سسکیاں کا مشورہ دیا ہے، میرا خیال ہے کہ آہ اور سسکیاں ہی رواں تھا
۔۔رات کس کو کہتے ہیں.... بھی مجھے رواں نہیں لگ رہا

 

[محمد خلیل الرحمٰن]

رات کہتے ہیں کسے

 

[الف عین]

جو کچھ میں کہنا چاہ رہا تھا سارے احباب کہہ چکے۔ بس یہ رہ گیا۔
صبح ہے نہ شام ہے
دن ہے اور نہ رات ہے
اور کا اُر تقطیع ہونا اچھا نہیں لگتا، یہ مصرع ضروری ہے کیا؟
مزید ایک مشورہ
وقت سے نہ بھر سکے
میرے زخم ہائے دل
وقت کا میں کیا کروں
وقت میرا کیا کرے
.... کیا یوں بہتر نہیں ہو گا
وقت بھی نہ بھر سکا
میرے زخم ہائے دل
اس کا میں کروں بھی کیا!
وقت میرا کیا کرے

 

[منذر رضا]

تمام مجوزہ تبدیلیوں کے بعد
الف عین فلسفی سید عاطف علی عظیم محمد خلیل الرحمٰن

نظم:وقت
رات بھی گزر گئی
اور دن بھی مٹ گیا
اب تو وہ مقام ہے
جس مقامِ یاس پر
صبح ہے نہ شام ہے
وقت سے کوئی گماں
اب مجھے نہیں رہا
بلکہ اب مرے لیے
ہر گھڑی ہے ایک سی
ہر گھڑی وہی فغاں
آہ اور سسکیاں
وقت بھی نہ بھر سکا
میرے زخم ہائے دل
اس کا میں کروں بھی کیا
وقت میرا کیا کرے
وقت کچھ نہ کر سکا
درد ویسا ہی رہا
رات بھی سیہ رہی
دن بھی زرد ہی رہے
ماہتاب بھی چھپا
آفتاب بھی بجھا
اب مجھے پتا نہیں
رات کہتے ہیں کسے
دن ہے کس بلا کا نام
اب مجھے پتا نہیں
کیا بجا ہے کیا نہیں
کیونکہ میرے واسطے
وقت کوئی شے نہیں!!!

 

[عظیم]

وقت میرا کیا کرے
وقت کچھ نہ کر سکا
میں 'وقت' کی تکرار مصرعوں کے شروع میں اچھی نہیں لگ رہی
کچھ نہ کر سکا ہے وقت
کیا جا سکتا ہے