نظم: والد کی وفات پر - - - ندا فاضلی

[محمد تابش صدیقی]

تمہاری قبر پر
میں فاتحہ پڑھنے نہیں آیا
مجھے معلوم تھا
تم مَر نہیں سکتے
تمہاری موت کی سچی خبر
جس نے اڑائی تھی
وہ جھوٹا تھا
وہ تم کب تھے.
کوئی سوکھا ہُوا پتا
ہوا سے ہِل کے ٹُوٹا تھا
میری آنکھیں
تمہارے منظروں میں
قید ہیں اب تک
میں جو بھی دیکھا ہوں
سوچتا ہوں ، وہ وہی ہے
جو تمہاری نیک نامی
اور بدنامی کی دنیا تھی
کہیں کچھ بھی نہیں بدلا
تمہارے ہاتھ
میری انگلیوں میں
سانس لیتے ہیں
میں لکھنے کیلئے
جب بھی قلم کاغذ اٹھاتا ہوں
تمھیں بیٹھا ہُوا میں
اپنی ہی کرسی میں پاتا ہوں
بدن میں میرے
جتنا بھی لہو ہے
وہ تمہاری لغزشوں
ناکامیوں کے ساتھ رہتا ہے
میری آواز میں چھپ کر
تمہارا ذہن رہتا ہے
میری بیماریوں میں تم
میری لاچاریوں میں تم
تمہاری قبر پر
جس نے تمہارا نام لکھا تھا
وہ جھوٹا تھا
تمہاری قبر میں تو
میں دفن ہوں
تم ، مجھ میں زندہ ہو
کبھی فرصت ملے تو
فاتحہ پڑھنے چلے آنا.

ندا فاضلی

 

[محمدظہیر]

میں نے یوٹیوب پر یہ نظم ندا فاضلی کی آواز میں سنی ہے۔ بہت عمدہ اور بروقت شیئرنگ ۔

 

[محمد تابش صدیقی]

میں نے یوٹیوب پر یہ نظم ندا فاضلی کی آواز میں سنی ہے۔ بہت عمدہ اور بروقت شیئرنگ ۔

اس کا ربط بھی یہاں شئر کر دیں۔

 

[اکمل زیدی]

 

[محمدظہیر]

اس کا ربط بھی یہاں شئر کر دیں۔

نظم چھ منٹ بعد شروع ہوتی ہے

 

[محمد تابش صدیقی]

نظم چھ منٹ بعد شروع ہوتی ہے

بہت شکریہ الہلال بھائی۔ اس کی وجہ سے بہت سی اغلاط درست کر لیں۔

 

[یاز]

بہت شاندار نظم ہے۔ ندا فاضلی صاحب کی کیا ہی بات ہے۔