شکیب جلالی نظم - ہمارا دور -شکیب جلالی

[پیاسا صحرا]

ہمارا دور

گلوں میں حسن شگوفوں میں بانکپن ہو گا
وہ وقت دور نہیں جب چمن چمن ہو گا

جہاں پہ آج بگولوں کا رقص جاری ہے
وہیں پہ سایہ شمشاد و نسترن ہو گا

فضائیں زرد لبادے اتار پھینکیں گی
عروسِ وقت کا زرکار پیرہن ہو گا

نسیمِ صبح کے جھونکے جواب دہ ہوں گے
کسی کلی کا بھی ماتھا جو پر شکن ہو گا

نئے اصول نئی منزلیں تراشیں گے
یہ قافلہ مہ و انجم میں خیمہ زن ہو گا

بڑے سکون سے تعمیرِ زندگی ہو گی
کہیں یزید، نہ آذر ، نہ اہرمن ہو گا

بتانِ عصر کے خالق کو باخبر کر دو
نئے زمانے کا ہر فرد بت شکن ہو گا

دکھے دلوں کی خراشیں جو کر سکے محسوس
اک ایسا صاحبِ دل صدرِ انجمن ہو گا

ہمارا دور مساوات لے کے آئے گا
ہمارے دور میں ہر آدمی مگن ہو گا

شکیب جلالی​

 

[فاتح]

سبحان اللہ! بہت خوب انتخاب ہے۔ شکریہ

 

[محمد وارث]

بہت خوبصورت نظم ہے، شکریہ جناب شیئر کرنے کیلیے!

 

[سید محمد نقوی]

بتانِ عصر کے خالق کو باخبر کر دو
نئے زمانے کا ہر فرد بت شکن ہو گا

امید ہے کہ یہ زمانہ جلد آہی جاے. ان شاء اللہ
بہت اچھی نظم ہے. شکریہ شامل کرنے کا

 

[شاہ حسین]

شامل محفل کرنے کا شکریہ ۔ اچھا انتخاب ہے ۔

 

[علی فاروقی]

انشااللہ،وہ دن بھی آئیں گے، امید کا دیپ جلاے رکھنا