نظم ۔۔۔ سرگوشیاں ، از : منصور آفاق ؔ

[منصور آفاق]

سرگوشیاں

شرم سار راتوں اور پُر ثواب صبحوں سے سرگوشیاں

صبح جیسے پُرسعادت ساعتوں کا افتتاح

رات جیسے منجمد ہو جائیں تیرہ تر گناہ

مہر جیسے خیر وبرکت کی کمائی حشر میں

چاند جیسے شاخ کی ٹوٹی ہوئی قوسِ بہار

دوپہر اس سوچ میں گم تُو نے کیوں چھوڑا مجھے

اور تارے جیسے بوندیں شال پر بکھری ہوئی

شام جیسے خون میں ڈوبی ہوئی قربان گاہ

اور شفق جیسے لہو میں گم سپاہی کا لباس

کس طرح ممکن ہوا یہ روز و شب کا معجزہ

عبادت کار پھولوں اور محبت بار پیڑوں سے سرگوشیاں

پھول جیسے تیرے جوڑے پر مکمل تبصرہ

اور کلی جیسے تعلق کی خبر پھیلی ہوئی

پیڑ جیسے نیکیوں کا کوئی اونچا سائباں

اور تنا جیسے کسی کا غیر فانی اعتماد

شاخ جیسے کوئی انگڑائی بدن میں دیر تک

خار جیسے بسترِ شب پر مسلسل انتظار

نرم پتی جس طرح کانوں کی نازک سی لویں

اور پھل تیرے لبوں کے تلخ و شیریں ذائقے

کس طرح رو کش ہوئیں یہ نخل و گل کی دیویاں

مظلوم زمین اور بے رحم آسمان سے سرگوشیاں

آسماں جیسے مرے اند ر کی وسعت کا حصار

اور زمین جیسے کسی ماں کی مقدس چاہتیں

کہکشاں جب تم ڈرائنگ روم میں داخل ہوئی

گرم صحرا جیسے لا محدود کرب ِ انتظار

جلوہ ، قوس ِ قزح تیرے بدن کے زاویے

سر د پانی تیرے میٹھے نرم لہجے کی طرح

کوہ جیسے میری سوچوں کی بلندی کا وقار

کالے بادل دشتِ جاں میں درد کی تاریک شام

اور ہوا جیسے تری سانسوں کا کومل زیر وبم

کس طرح جاری ہوا ارض و سما کا سلسلہ

سر گوشیوں کے سوالوں اور حیرت زدہ جوابوں سے سر گوشیاں

وادی ، ذہن و نظر میں ایسے پیچیدہ سوال

اضطراب افزا تسلسل سے جنم لیتے رہے

آدمی اور کائناتِ خارجی میں ارتباط

کیوں ہے ۔ کیا ہے۔ کس طرح ہے اور آخر کس لئے

مجھ پہ کیا موقوف شاید کوئی بھی سمجھا نہیں​

منصور آفاقؔ​

 

[محمد خلیل الرحمٰن]

ust 2011

آدمی اور کائناتِ خارجی میں ارتباط​

​

واہ منصور بھائی!
شاعر کا فطرت سے ربط بہت خوب ہے۔ بہت داد قبول ہو۔

ایک مصرع میں شاید ٹائیپو ہے۔

کہکشاں جب تم ڈرائنگ روم میں داخل ہوئی ( ہوئیں؟)​

 

[محمد بلال اعظم]

بہت اعلیٰ

 

[الف عین]

عمدہ نظم ہے منصور صاحب، لیکن یہ بتائیں کہ یہ کس فانٹ میں تحریر کی گئی ہے؟

 

[محمد وارث]

کیا خوبصورت نظم ہے منصور صاحب۔ بہت داد قبول کیجیے محترم۔

 

[فاتح]

سبحان اللہ کیا ہی خوبصورت نظم ہے۔ اس تخلیق پر مبارک باد قبول کیجیے۔

 

[مغزل]

منصور آفاق ؔ صاحب نظم سرگوشیاں باصرہ نواز ہوئی ،رسید حاضر ہے ، فرصت پاتے ہی حاضر ہوتا ہوں۔۔۔

 

[محمداحمد]

واہ !

اور بے اختیار واہ۔۔۔۔!

خوبصورت نظم ہے۔ کیا کہنے جناب ۔

خوش رہیے۔

 

[منصور آفاق]

مغل صاحب ۔۔۔۔ یہ باصرہ نوازصاحبہ کون ہیں

 

[فاتح]

منصور بھائی! آپ کو پاکستان سے گئے چونکہ کافی عرصہ گزر گیا ہے لہٰذا آپ موجودہ ملکی داخلی وارداتوں سے بے خبر ہیں۔ باصرہ نواز دراصل مریم نواز کی صاحبزادی ہیں۔

 

[منصور آفاق]

میں سمجھا تھا یہاں برطانیہ کی معروف ادبی شخصیت باصرہ کاظمی کی بیٹی ہیں

 

[مغزل]

مغل صاحب ۔۔۔ ۔ یہ باصرہ نوازصاحبہ کون ہیں

باصرہ نواز صاحبہ یعنی ’’ العین ‘‘ المعروف عینی ۔۔۔ یعنی بصیرت یعنی بصارت گھر یعنی آنکھوں یعنی (مراد ) نگاہ یعنی (مراد) نظروں کو میسر ہوئی ۔۔۔ یعنی یعنی یعنی ۔۔۔

 

[منصور آفاق]

سوری ۔۔سوری دراصل میں ان دنوں ضعف ِبصارت و بصیرت کا کچھ زیادہ شکار ہوں۔۔اس لئے وحید مراد مرحوم بھول گئے تھے