نعتِ رسولِ کریم صلی اللہ علیہ وآلہ وسلم ،اللہ نے یہ شان بڑھائی ترے در کی ٭ منور بدایونی

[محمد عدنان اکبری نقیبی]

اللہ نے یہ شان بڑھائی ترے در کی
بخشی ہے ملائک کو گدائی ترے در کی

پانے کو تو خورشید و قمر چرخ نے پائے
کیا پایا اگر خاک نہ پائی ترے در کی

جنت نے اتارے تو بہت نور کے نقشے
تصویر مگر ہاتھ نہ آئی ترے در کی

حوروں نے، ملائک نے، اجنا نے، بشر نے
کس کس نے کہاں بھیک نہ پائی ترے در کی

اللہ کے گھر سے ہے رسائی ترے در تک
اللہ کے گھر تک ہے رسائی ترے در کی

لے جائے گی اک دن مجھے طیبہ میں اڑا کر
جس وقت ہوا جھوم کر آئی ترے در کی

محشر میں بھی اس شان سے جاؤں گا منور
رکھے ہوئے کاندھے پہ چٹائی ترے در کی

منور بدایونی​

 

[یاسر شاہ]

بہت خوب عدنان بھائی -ما شاء اللہ

ہر شعر کا آخری لفظ بدل دیں

کے =کی

 

[عباس رضا]

آواز: حاجی مشتاق عطاری (مرحوم)

 

[جاسمن]

سبحان اللہ!
جزاک اللہ خیرا کثیرا۔