براہوئی ٹی نعت گوئی
نوشتہ: مولوی عبدالخالق ابابکی
حمد نا حقی آخواجہ ہموذات اللہ تعالیٰ ئے کہ نن کن مون تس نبی ئس۔ اندھن شکر رب پاک نا کہ ننے ہدایت نا کسرے خواجہ صلی اللہ علیہ وسلم نشان تس۔ خواجہ ﷺ نا بھلا صفت دا کہ اللہ پاک تینا پاک انگا پن تو ننا نبی محترم ﷺ نا نامِ نامِ گرامی ئے خلا اوار کرے۔ لولاک لما خلقت الا افلاک نا زیبدارا جملہ ہچو نبی سے کن پھاش متو مگر دا صفت ننا سرکار دو عالم ﷺ نا مبارک آ نصیب کن زیب تس۔
اگر رب پاک نا صفت آتا ختمی مفک تو اندھن خواجہ ﷺ نا صفت آ گیشتری حساب اٹ بفک دنیا نا ہچو مذہب ئس خواجہ نا کمالات نا منحرف افک۔ دنیا منا دنیائے منوئی تمک بہر حال ہیتک آک بھاز کاٹم تا اسٹ دا کہ ؎
بلغ العلی بکمالہٖ کشفیٰ الدجا بجمالہٖ
حسنت جمیع خصالہٖ صلوا علیہ و آلہٖ
مچا صفت آک اندا شیخ سعدی رحمۃ اللہ علیہ نا اُست نا اُست آن کشوکا تران پورواری کہ ثابت ئے اگر صحیح تحقیق آ سر مرین تو دھنو اسلامی ئُُ ہچو کتاب ئس دو بفرو ہرا کہ رب نا حمد آن گڈ خواجہ ﷺ نا صفت اوٹی مفرو۔ بلکہ ضرورنظر بریک اندا قیاس شاعر آتا شاعری نا صنف اٹ ہم صاف پھاش ئے کہ اول حمد اوکان پد خواجہ غا نعت نا رنگ اٹ شعر آک اوفتا کتاب نا اول سر اٹ خن تا مون آ بریرہ۔داکان بیدس اندھن ئُُ شاعر اریر کہ مکمل خواجہ نا ثناء و صفت اٹ نعت نا رنگ اٹ نوشتوک اریر و مسونو دا اوفتا محبت و خواجہ ﷺ غا ندر مننگ نا نشانی ئے۔دنیا نا ہر ہر زبان ٹی اہل زبان آک نعت نا نوشتہ تو تینا است آتے سیبو و پدین کرینو ۔دا قطار اٹ براہوئی اہل زبان ئے ہم رب پاک دا صفت نصیب تس کہ دا سعادت نا بختاوری نا لائخ مسر ۔ الحمد للہ علی ذالک دا رد اٹ عبدالحیات منصورؔ صاحب تینا معلومات نا مطابق اندا کتاب ٹی علمی حوالہ تسنے کہ نعت انتے پارہ و گڑاس براہوئی شاعر آتا حوالہ ہم نوشتوک ئے دا کتاب نا مختصراً جائزہ آن دا پھاش مریک کہ خواجہ منصور براہوئی ئے تینا نبی ﷺ تو بسنو عقیدت ئس تخک کہ کلامِ شعراء تے مرتب کننگ نا سعادت ئے ہلک۔ پارہ کہ محبت ہر گڑانا کاٹم ئے ۔ محبت نا کہی ہزارا قسم آک ئُُ ۔ محبت طالب ئے مطلوب اسہ سدھائُُ کسر سے خاص کر اللہ تعالیٰ و اونا محبوب ﷺ تو محبت اصل صراط مستقیم اندادے ہراکہ دا کسر منزلِ مقصد آ سر کیک ۔لہذادا پاروئی مریک کہ منصور صاحب ئے تینا نبی ﷺ تو بھلو محبت ئس ارے ۔ اندا محبت نا بنا غا دا کتاب ناسعادت اونا نصیب اٹ بس۔ ایلم منصور صاحب نا ادبی کار کردگی اہل ادب نا مونا چراغ آ نبار روشن ئے ۔ دانا اعتراف اٹ ای واہم تسلیم کیوہ کہ براہوئی ادب ٹی دا درویش صفت آ انسان اسہ باب سے نا حیثیت ئے تخک۔
دا ہیت حقیقت نائے کہ آدم ، بنی آدم ، آدم تو کل اریر مگر آدم ٹی انسان مننگ دا قسمت نا خواجہ اسٹ اسٹ نظر بریک ۔ دھنو ہم آدم ذات ارے کہ قوم تے ٹی خاخر شارہ و دھنو ہم ارے کہ فاتح و غازی، عادل و بہادر نا لقب اٹ زیب ہلکنو و قوم آتے زندگی بشخانو۔ دا ہیت تینا جہا لیکن منوئی ہمودے کہ قوم سے نا قومیت ئے برقرار تخننگ آن بیدس معاشرہ سے بدل کننگ و علاقہ سے پن تننگ وغیرہ آتے ٹی تینے نمایاں کننگ تو اوار تینے و تینا تشخص ئے برقرار تخننگ دا اصل بنیادی انسانیت نا مقام ئے ہلیک ۔ ہاں دا ہیت یقین ئے دا ثابت کیک کہ بندغ ارا رنگ اٹ تینا یات آتن الیک کاہک دھنکہ سید نا موسیٰ ؑنا منسب نبوت و اونا متضاد فرعون نا فرعونیت ۔ دا کل ئے سمائے کہ دافتا پن ہرا رنگ اٹ ہلنگک اندا رنگ اٹ دانشور، عالم و قلم کار آتا علمی و عملی پہلو آ نظر شانہ تو ننے پین کسر ئس دو بریک دا کسر ٹی ذہنی سفر کرسا و ہنسا ننے اندھنو بڑز ئُُ مقام ئس دو بریک ہرا کہ بادشاہ تا سلطنت آن بھاز وسیع تر ئے دا ہیت ئے ہر بندغ ہر جا سرپند کیک کہ بادشاہ تا سلطانی آ زوال ارے لیکن قلم نا سلطان و اونا سلطنت تابہ دنیا قائم ئے۔
قلم آن علم آک کتاب آتے ٹی خوندی مریرہ و بندغ آک خنی مریرہ و اونا توار ہرہر اُرا ٹی سر مریک۔ مگر دا ہم ارے کہ قلم نا جیب ٹی خلننگ ئے چنا ہم چاہک لیکن اونا وہیفنگ ہر ہر بندغ نا وس و طاقت آن مرے۔ نعمت ناحق دار قسمتی اسٹ ئس مریک دا قسمت نا زنجیر نا کڑی ٹی حق دار انگا تینا الہ مل منصورؔ صاحب ئے بر حق چاوہ کہ اللہ تعالیٰ اودے دا صلاحیت نا خواجہ کرے۔ داسہ درد نا ہیت سے کہ قدر شناس آتا قدر اِنا بے قدری آک قدری مسر و قدری آک بے قدر مسر۔ باوجود ئے دا عالم و حقیقت نا اسٹ ئس مخ تفے تو دا بھلو مجاہدہ سے ؎
زرنا قدر ئے کہ زرگر پہہ مرو
جاہل انگا عالم ئے انت قدر ترو
٭٭٭
