حسان خان
لائبریرین
سازِ ولا پہ کون غزلخواں ہے یا علی
ہر ذرہ کائنات کا رقصاں ہے یا علی
تیری ہر ایک سانس تری ہر نگاہ میں
گنجِ حدیث، دولتِ قرآں ہے یا علی
تیری تجلیوں کے تموج سے آج بھی
اس تیرہ خاکداں میں چراغاں ہے یا علی
اب بھی ترے حُسین کے گل رنگ خون سے
یہ خارزارِ دہر گلستاں ہے یا علی
اب بھی ترے چراغ کے انوارِ غیب سے
ہر شامِ تیرہ صبحِ درخشاں ہے یا علی
تیرے جمالِ اکبر و قاسم سے یہ زمیں
بازارِ مصر و گوشۂ کنعاں ہے یا علی
جو آندھیوں کی زد پہ جلی تھی لبِ فرات
اس وقت بھی وہ شمع فروزاں ہے یا علی
جس پیاس نے بجھائی تھی ایماں کی تشنگی
وہ پیاس اب بھی چشمۂ حیواں ہے یا علی
شکرِ خدا کہ سروِ گلستانِ فاطمہ
اس جادۂ نفس پہ خراماں ہے یا علی
ہاں تیرا نام، تیرا تصور، ترا خیال
افسانۂ حیات کا عنواں ہے یا علی
تجھ سے نہ کیوں ہو لرزہ بر اندام اہرمن
تو خلوتیِ حضرتِ یزداں ہے یا علی
محرابِ آب و رنگ میں تیری زبان کا
اک ایک حرف لولو و مرجاں ہے یا علی
تو جس کا ناخدا ہو وہ خس کا سفینہ بھی
فرماں روائے کشورِ طوفاں ہے یا علی
تیری وہ شان ہے کہ ترا ہر گدائے راہ
سلطانِ عصر و خسروِ دوراں ہے یا علی
جس خاک پر رمائے ہیں دھونی ترے فقیر
وہ خاک رشکِ تختِ سلیماں ہے یا علی
تیرا وجود اشارہ سوئے وجہِ ذوالجلال
تو مشعلِ حریمِ رگِ جاں ہے یا علی
تیرے نقوشِ فکر سے زلفِ حیات پر
تابندگیِ موجۂ افشاں ہے یا علی
رنگِ شگافِ کعبہ و چینِ قبائے حور
کس کا یہ حسن چاک گریباں ہے یا علی
رہتا ہے ابرِ قبلہ کے آغوش میں وہ رند
جس پر کہ تیرا سایۂ داماں ہے یا علی
غلطاں ہے دل میں یوں تری ساقی گری کا رنگ
ہر جادہ کوئے بادہ فروشاں ہے یا علی
کہتا ہوا یہ ناز سے کوثر پر آؤں گا
فدوی امیرِ بادہ پرستاں ہے یا علی
تیری نسیمِ فیض کی موجِ لطیف میں
نازِ خرامِ ابرِ بہاراں ہے یا علی
بندے کو تیرے عشق نے بخشی ہے وہ نگاہ
کونین زیرِ جنبشِ مژگاں ہے یا علی
ہاں زندہ باد گردشِ مینا و ردِّ شمس
ہر صبح کو یہ نعرۂ مستاں ہے یا علی
تیرا ہی یہ کرم ہے کہ یہ جوشِ وہم سوز
اس کفر پر بھی مشعلِ ایماں ہے یا علی
(جوش ملیح آبادی)
