نہ کوئی میرا رَفیق ٹھہرا نہ کوئی میرا حَبیب ٹھہرا

[ذکی انور ہمدانی]

پیشِ خِدمت ہے خاکسار کا کلام، ان لمحات کے نام کہ جب نشاطِ چمن بھی خزاں کی کسک یاد دلانے پر آمادہ ہو، جب رقیب ہی واحد رفیق معلوم ہو، جب کوئے جاناں بھی کوئے مقتل معلوم ہو کہ انجام ہر دو راہوں کا یکساں ہوتا ہے۔۔۔۔۔ ہر ایک کسک آشنا قلب کی خدمت میں نغمہ جاوداں۔۔۔



نہ کوئی میرا رَفیق ٹھہرا نہ کوئی میرا حَبیب ٹھہرا
کٹھن وَفا کے سَفر میں شامِل رَہا جو میرا رَقیب ٹھہرا


بَہار آئی، چَمن ہے مَہکا، ہَر ایک گوشہ گُلوں سے دَہکا
کَسک خِزاں کی نہ جا سَکی پَر، کہ دِل کا عالَم عَجیب ٹھہرا


ہو ذِکر کیوں یاں صَنم کَدوں کا، کَبھی جفا کا، کَبھی سزا کا ؟
ہَمیں تھا خاطِر کُچھ اور سُننا، یہ کیا سُنانے خَطیب ٹھہرا


یہ کُوئے جاناں وہ کُوئے مَقتل، یہ فَیصلہ ہے بَہت ہی آساں
ہَمیں تو آخِر ہے جاں سے جانا، یَہی ہمارا نَصیب ٹھہرا


کوئی نَوازِش کوئی سِتَم ہو، کوئی فَسانہ کبھی رَقَم ہو
یہی ہیں راہِ وفا کے حاصِل، بِنا میں اِن کے غَریب ٹھہرا


تِری نَظر نے یہ کیا ہے پُوچھا، کبھی ہے میں نے کِسے بَتایا؟
نَصیب میں تُو لِکھا نہیں تھا مَگر ہے دِل کے قَریب ٹھہرا


بقلم ذکی انور ہمدانی،
میلبورن، آسٹریلیا
مورخہ ۵ِ جولائی ۲۰۲۲