وادی کاغان کی سیر

[حسیب]

السلام علیکم و رحمتہ اللہ و برکاتہ​

پچھلی گزری ہوئی عید یعنی عید الفطر پہ وادی کاغان کی سیر کا پروگرام بنا۔ایک بارہ سیٹوں والی ہائی ایس گاڑی کرایہ پر حاصل کر لی۔ پہلے تو لوگ ہی پورے نہیں ہو رہے تھے۔ مگر پھر عین وقت پر ایک دوست اور آ گیا یعنی ہم تیرہ دوست ہو گئے۔ عید کی رات کو نکلنے کا پروگرام تھا۔ آخر کار رات بارہ بجے سفر کا آغاز کیا۔ رات کا وقت ہونے کی وجہ سے ٹریفک کافی کم تھی۔ ڈرائیور نے اسی چیز کافائدہ اٹھایا اور صبح فجر کی نماز ہم نے ہری پور ہزارہ میں پڑھی۔ نماز پڑھ کے فوراً آگے کا سفر شروع کر دیا۔ پہلا پڑاؤ مانسہرہ میں ہوا۔ وہاں رک کر ناشتہ کیا۔ کھانے پکانے کا سامان ہم ساتھ ہی لے کر آئے تھے۔ کیونکہ ابھی کافی سفر باقی تھا اس لیے ناشتے میں بریڈ اور چائے پر ہی اکتفا کیا۔ اور کچھ تصاویر بھی لیں

تقریباً دو گھنٹے رکنے کے بعد آگے مزید سفر شروع ہوا۔ مانسہرہ سے کچھ آگے جا کر دریائے کنہار بھی اپنا نظارہ کروانا شروع کر دیتا ہے اور وادی کاغان کے آخر تک اپنا نظارہ کرواتا رہتا ہے۔ کچھ تصاویر چلتی ہوئی گاڑی سے

 

[حسیب]

تقریباً بارہ بجے ہم وادی کاغان کے مرکزی علاقے ناران میں پہنچ گئے۔

اب پہلا کام رہنے کے لیے کوئی جگہ تلاش کرنا تھا۔ چونکہ عید کے دن تھے اس لیے رش بہت زیادہ تھا۔ آخر کافی گھومنے پھرنے کے بعد خیمے میں رہنے کا فیصلہ ہوا اور ایک خیمہ کروا لیا۔ اور پھر کچھ دوست کھانا پکانے لگے گئے اور کچھ گھومنے پھرنے۔ ایک طرف کافی اونچائی پہ گورنمنٹ کے کچھ گیسٹ ہاؤس تھے ۔ وہاں اوپر جا کر نیچے ناران کی کچھ تصاویر لیں ۔ دریائے کنہار بھی نظر آ رہا ہے

یہ ایک چشمہ ہے جو دریائے کنہار میں شامل ہوتا ہے۔وہاں ایسے بہت سارے چھوٹے چھوٹے چشمے ہیں۔ وہاں لوگ روزمرہ کے استعمال کے لیے انہی چشموں کا پانی استعمال کرتے ہیں۔

ناران میں بجلی کا شاید صرف سرکاری اداروں تک ہی محدود ہے۔ تمام ہوٹلوں میں جنریٹر ہی استعمال ہوتے ہیں۔ موبائل کوریج بھی صرف ناران تک ہی محدود ہے۔ آپ ناران سے کچھ آگے نکل جائیں تو موبائل کوریج بالکل ختم ہو جاتی ہے

 

[حسیب]

کھانا کھانے کے بعد جب خیمے میں گئے وہاں کچھ دیر آرام کیا اور پھر مغرب کے بعد ناران بازار کی آوارہ گردی کی ٹھانی۔ تقریباً رات گیارہ بجے تک بازار میں گھومتے رہے اور پھر واپس آ کر سو گئے۔
اگلے دن صبح اٹھ کر ناشتہ کیا اورہم تین لوگ کسی ہوٹل یا گیسٹ ہاؤس کی تلاش میں نکل گئے۔ اور باقی لوگ لنچ کے لیے کچھ پکانے کا انتظام کرنے لگ گئے۔ خیمے والا نظام کچھ اچھا نہیں تھا اور ساتھ ساتھ رات کو جب ہم بازار میں گھوم رہے تھے تو کچھ دوستوں کی خیمے والے کے ساتھ کچھ اَن بن ہو گئی۔ اس لیے خیمہ چھوڑنے کا فیصلہ کیا۔ آخر کار ایک گیسٹ ہاؤس میں دو کمرے بک کروائے اور وہاں اپناسامان منتقل کرنے کے بعد افسانوی شہرت کی حامل جھیل سیف الملوک کی طرف راونگی کا ارادہ کیا۔ جھیل سیف الملوک جانے کے لیے جیپ استعمال ہوتی ہے یا پھر پیدل جایا جا سکتا ہے۔ چونکہ ہم کافی لیٹ ہو چکے تھے اس لیے جیپ ڈھونڈنا بہت مشکل ہو چکا تھا۔ آخر فیصلہ یہ ہوا کہ پیدل ہی چلتے ہیں جہاں جیپ ملے گی وہاں سے لے لیں گے۔ ہم چھ لوگ ذرا آگے نکل چکے تھے اور باقی پیچھے تھے۔ پیدل راستے کے بارے میں سنا تھا کہ تقریباً تین کلومیٹر ہے مگر وہ بھی پیدل چلنا حد سے زیادہ مشکل تھا۔ پیدل ٹریک کی کچھ تصاویر

جو لوگ پیچھے رہ گئے تھے انہیں جیپ مل گئی جبکہ اس وقت تک ہم سڑک سے ہٹ کر پیدل ٹریک پہ پہنچ چکے تھے۔ تقریباً تین گھنٹے چلنے کے بعد ہماری ہمت بھی جواب دے چکی تھی تو ہم نے بھی سڑک پہ پہنچ کر ایک جیپ لی باقی تھوڑا سا رستہ جیپ میں طے کیا۔ وہاں جیپ والے نے ہمیں جھیل کی طرف جانے پیدل ٹریک کے پاس اتار دیا تو تقریبا پندرہ منٹ اور چل کر ہم جھیل سیف الملوک پہنچ گئے۔ وہاں تھوڑا سا راستہ ایسا بھی تھا کہ وہاں سے ایک وقت میں صرف ایک آدمی گزر سکتا تھا اور وہ بھی ایک سائیڈ پہ چل کر

یہ ایک ہیلی کاپٹر وہاں گھوم رہا تھا

سامنے برف پوش پہاڑ ملکہ پربت ہے۔ جو وادی کاغان کا سب سے اونچا پہاڑ ہے

کچھ بادلوں کے مناظر

یہ گھوڑے عام طور پر آنسو جھیل جانے کے لیے استعمال ہوتے ہیں۔ وقت کی کمی کی وجہ سے آنسو جھیل کا پروگرام بھی کینسل کرنا پڑا

​

 

[حسیب]

جھیل کے پاس موجود ہوٹل

بادل کچھ دیر کے لیے غائب ہوئے تو سورج نے پہاڑوں پہ ایک خوبصورت منظر بنایا

واپسی جیپ کے ذریعے ہوئے۔ واپس آتے ہوئے ایک راستے کی ایک ویڈیو بھی بنائی ۔ شام ہونے کی وجہ سے کچھ دھندلی ہے

 

[حسیب]

واپس آ کر کھانا کھایا اور سو گئے۔ اگلے ناران سے اگلے علاقے دیکھنے کا پروگرام بنا اور جھیل لولو سر تک جانے کا فیصلہ کیا۔کہا جاتا ہے کہ وادی کاغان کی اصل خوبصورتی ناران سے آگے ہے۔ ناران سے جھلکڈ تک کا علاقہ خوبصورتی میں لاجواب ہے اور اس سے آگے جھیل لولوسر تک خشک علاقہ ہے۔ وہاں صرف پتھر ہی دیکھنے کو ملتے ہیں۔ جھیل لولو سر وادی کاغان کی سب سے بڑی جھیل ہے اور اس کا پانی سبز رنگ کا ہے۔ اس کی شیپ کچھ ایسی ہے کہ آپ کسی بھی جگہ کھڑے ہو کر مکمل جھیل نہیں دیکھ سکتے۔ جاتے ہوئے کیمرہ غلطی سے بیگ میں رکھ دیا تھا اس لیے کوئی تصویر نہ لے سکا۔ آخر کار جھیل لولو سر جا کرکیمرہ نکالا

کچھ دیر جھیل لولو سر رکنے کے بعد واپسی کا سفر شروع کیاواپسی کی کچھ تصاویر

​

 

[حسیب]

راستے میں جھلکڈ سے کچھ آگے ایک جگہ رک کر کھانا پکانے اور کھانے کا فیصلہ کیا۔جہاں رکے تھے اس جگہ کی کچھ تصاویر۔ جو تصاویر زوم کر کے لی تھیں وہ کچھ دھندلی ہیں

 

[حسیب]

ابھی کھانا پک رہا تھا کہ ایک طرف سے کالے سیاہ بادل اُمڈ آئے اور ساتھ ہی ٹھنڈی تیز ہوا چلنا شروع ہو گئی۔ موسم اتنی تیزی سے بدلا کہ ہمیں فوراً جیکٹیں وغیرہ نکال کر پہننی پڑیں۔ کچھ دیر بعد ہلکی ہلکی بوندا باندی بھی شروع ہو گئی۔ لیکن تیز بارش آنے سے پہلے پہلے ہم کھانا کھا کر فارغ ہو چکے تھے۔ اور پھر واپسی کا سفر شروع ہوا
واپسی پہ لی گئی کچھ تصاویر۔ دریائے کنہار یہاں بھی سڑک کے ساتھ ساتھ سفر کرتا رہتا ہے۔

جوڑ اناڑ نالہ یہاں دریائے کنہار سے ملتا ہے

کھانا کھانے کے بعد جب واپس نکلے تھے تو ایک چھوٹی سی ویڈیو بھی بنائی تھی

 

[قیصرانی]

بہت خوب

 

[قیصرانی]

آخری وڈیو میں ڈرائیو بار بار لین چینج کر رہا تھا، کیا لینڈ سلائیڈ کا ڈر تھا؟ اور بارہ سیٹوں والی ہائی ایس کیا کوئی نئی ویگن ہے؟ یا اصل ہائی ایس اصل سیٹنگ کنفگریشن کے ساتھ؟ کل اخراجات کے بارے بھی بتائیے

 

[قیصرانی]

آخری وڈیو میں ہائی ایس کے ڈیش بورڈ پر نیویگیٹر تھا کہ نرگسی مُجروں کی سہولت؟

 

[حسیب]

اب ہمارا پڑاؤ بٹہ کنڈی میں ہوا۔ وہاں کچھ دیر رکے۔

وہاں پتا چلا کہ یہ جو سامنے سب سے اوپر درخت نظر آ رہے ہیں ان کی دوسری طرف لالہ زار ہے۔ تو ایک ایڈوینچر کی ٹھانی اور اوپر کی طرف سفر شروع کر دیا۔ مگر اوپر تک پہنچے بغیر ہی واپس آ گئے کیونکہ دیکھنے میں تو کافی نزدیک لگ رہا تھا مگر حقیقت میں بہت زیادہ سفر تھا۔

کافی اوپر جا کر کچھ تصاویر لیں اور واپس آ گئے ۔ یہاں تقریباً دو گھنٹے گزار دئیے

موسم دیکھیں کتنی تیزی سے تبدیل ہوا۔کچھ دیر پہلے تک بادل تھے اور پھر تیز دھوپ

اس کے بعد واپسی کا سفر شروع ہوا۔ ناران سے نکلنے کے کچھ دیر بعد ہی ایک نیا تجربہ ہوا اور ہم ایک بدترین ٹریفک جام میں پھنس گئے اور اس ٹریفک جام سے نکلنے میں پانچ گھنٹے لگ گئے۔ ناران سے کاغان کا 24 کلومیٹر کا سفر تقریباً ساڑھے پانچ گھنٹوں میں طے ہوا۔ اس ٹریفک جام نے ہمارا شاپنگ کا منصوبہ بھی ختم کر دیا ۔ اور پھر واپسی ہی واپسی۔ ایک دوست نے اسلام آباد ائیر پورٹ پہ اپنے بھائی کو پک کرنا تھا اس لیے صبح تک اسلام آباد پہنچنے کی ٹھانی۔ صبح تقریباً سات بجے اسلام آباد پہنچ گئے اور فیصل مسجد میں کچھ دیر رک کر آرام کیا

پہلے تو یہی ارادہ تھا کہ اسلام آباد بھی گھوما جائے مگر ساری رات گاڑی میں گزارنے کی وجہ سے تھکاوٹ بہت ہو چکی تھی۔ اس لیے اسلام آباد کا پروگرام بھی منسوخ کیا اور واپس سیالکوٹ کی طرف روانہ ہو گئے۔ اور آخر کا ر لوٹ کے سیالکوٹ ہی آ گئے۔ہم مختصر ٹور کی وجہ سے یہی علاقے گھوم سکے ورنہ وادی کاغان کی مکمل سیر کرنے کے لیے ایک ہفتہ بھی کم ہے۔ زیادہ خوبصورت علاقے بہت دور دور ہیں​

 

[زیک]

زبردست

 

[حسیب]

آخری وڈیو میں ہائی ایس کے ڈیش بورڈ پر نیویگیٹر تھا کہ نرگسی مُجروں کی سہولت؟

ایک تیر سے دو شکار کیے ہوئے تھے

 

[حسیب]

آخری وڈیو میں ڈرائیو بار بار لین چینج کر رہا تھا، کیا لینڈ سلائیڈ کا ڈر تھا؟

شاید کیمرہ ایک جگہ فوکس نہ ہونے کی وجہ سے ایسا معلوم ہو رہا ہے۔ ورنہ وہاں کہیں لینڈ سلائڈنگ کا خطرہ تو نہیں تھا۔

اور بارہ سیٹوں والی ہائی ایس کیا کوئی نئی ویگن ہے؟ یا اصل ہائی ایس اصل سیٹنگ کنفگریشن کے ساتھ؟

اصل ہائی ایس میں فولڈنگ سیٹوں کا اضافہ کیا گیا تھا۔

کل اخراجات کے بارے بھی بتائیے

کل اخرجات تقریبا 82 ہزار تھے بمعہ گاڑی کا کرایہ وغیرہ

 

[قیصرانی]

شاید کیمرہ ایک جگہ فوکس نہ ہونے کی وجہ سے ایسا معلوم ہو رہا ہے۔ ورنہ وہاں کہیں لینڈ سلائڈنگ کا خطرہ تو نہیں تھا۔

اصل ہائی ایس میں فولڈنگ سیٹوں کا اضافہ کیا گیا تھا۔

کل اخرجات تقریبا 82 ہزار تھے بمعہ گاڑی کا کرایہ وغیرہ

وڈیو کے شروع سے دیکھیں تو پتہ چلتا ہے کہ گاڑی کبھی دائیں تو کبھی بائیں اور کبھی درمیانی لکیر کے عین اوپر چل رہی تھی۔ ہمارے ہاں دھندلکے کے وقت ڈرائیونگ اگر غیر آباد علاقوں میں کی جا رہی ہو تو ہم کوشش کرتے ہیں کہ سڑک خالی ہو تو عین درمیان میں چلیں، تاکہ سڑک عبور کرنے کوئی جانور سامنے آئے تو اسے آسانی سے ٹیکل کیا جا سکے۔ اسی وجہ سے لینڈ سلائیڈنگ ذہن میں آئی

 

[محمد ابوبکر]

زبردست حسیب بھائی
میری نظر سے آج گزرا

 

[محمد ابوبکر]

آپ نے جہاں ناشتہ کیا تھا ہم نے بھی وہاں ہی دریا کنارے ایک ہوٹل میں ناشتہ کیا تھا