وہ بے رخی کہ تغافل کی انتہا کہیے ۔ سرور بارہ بنکوی

[فرخ منظور]

وہ بے رخی کہ تغافل کی انتہا کہیے
بہ ایں ہمہ اُسے کس دل سے بے وفا کہیے

غمِ حیات و غمِ کائنات سے ہَٹ کر
کسی کے قامت و گیسو کا ماجرا کہیے

وہ منفعل ہو، کہ ہو مشتعل بَلا سے مگر
کبھی تو حالِ دلِ زار بَرملا کہیے

ادب کا ہے یہ تقاضا کہ اُس کی محفل میں
سکوتِ ناز کو بھی نغمہ و صدا کہیے

تضادِ رسمِ وفا پر نہ جایئے، اُس کو
سمجھیے دشمنِ جاں ، جانِ مدعا کہیے

ہم اپنے دور میں جس بانکپن سے زندہ ہیں
اسے ہم اہلِ محبت کا حوصلہ کہیے

جھکی جھکی سی نگاہیں، دبی دبی سی ہنسی
ندامت ایک طرف اس ادا کو کیا کہیے

حضورِ حضرتِ غالبؔ، سرور آج کوئی
حکایتِ کرمِ چشمِ سُرمہ سا کہیے

سرور بارہ بنکوی​

 

[محمداحمد]

بہت خوب انتخاب ہے۔