ٹوٹا مندر دیکھے کوئی

[عاطف ملک]

ٹوٹا مندر دیکھے کوئی
میرے دل میں جھانکے کوئی

ایک اک کر کے بکھر چکے ہیں
میرے خواب سمیٹے کوئی

تیری آنکھیں غیر کی طالب
آئینہ کیوں دیکھے کوئی

دل کے باغ میں ہے ویرانی
خوشبو آن بکھیرے کوئی

کب سوچوں میں گم ہو جائے
جانے بیٹھے بیٹھے کوئی

چُھو کر عشق کی بادِ صبا کو
پھولوں جیسا نکھرے کوئی

غم کے طوفانوں کے آگے
انگاروں سا دہکے کوئی

دھوپ سے لڑتی برف کے جیسے
قطرہ قطرہ پگھلے کوئی

راکھ کرے یہ آگ لگن کی
سلگے، تڑپے، چیخے کوئی

دَین ہے اس کی، درد کی دولت
مانگے کوئی، پائے کوئی

عاطفؔ نے جو بات چھپائی
بن بولے ہی سمجھے کوئی

عاطفؔ ملک
۲۰ دسمبر ۲۰۱۸​

 

[محمد عدنان اکبری نقیبی]

واہ واہ ،
زبردست عاطف بھائی ،کیا بات ہے ۔

 

[امان زرگر]

دل کو مندر کہنا ؟۔۔۔۔ کچھ دل کو اچھا نہیں لگا

 

[عاطف ملک]

واہ واہ ،
زبردست عاطف بھائی ،کیا بات ہے ۔

بہت شکریہ عدنان بھائی

دل کو مندر کہنا ؟۔۔۔۔ کچھ دل کو اچھا نہیں لگا

میرے خیال میں تو اس میں کوئی قابلِ اعتراض بات نہیں ہے۔