مصطفیٰ زیدی پاگل خانہ ۔ مصطفیٰ زیدی

[فرخ منظور]

پاگل خانہ​

ہر طرف چاکِ گریباں کے تماشائی ہیں
ہر طرف غولِ بیاباں کی بھیانک شکلیں
ہم پہ ہنسنے کی تمنا میں نکل آئی ہیں​

​

​

چند لمحوں کی پر اسرار رہائش کے لیے
عقل والے لبِ مسرور کی دولت لے کر
دور سے آئے ہیں اشکوں کی نمائش کے لیے​

​

​

عقل کو زہر ہے وہ بات جو معمول نہیں
عقل والوں کے گھرانوں میں پیمبر کے لیے
تخت اور تاج تو کیا ، بنچ اور اسٹول نہیں​

​

​

اپنی ٹولی تو ہے کچھ سوختہ سامانوں کی
اکثریت میں ہم آتے تو سمجھتی دنیا
اس کٹہرے کے ادھر بھیڑ ہے دیوانوں کی​

​

​

(مصطفیٰ زیدی)​

شہرِ آذر سے انتخاب​