طارق شاہ
محفلین
غزل
پرویز ساحِر
اِس کارِ عِشق میں نہیں کوئی ہوَس مُجھے
میری متاعِ آتِشِ سُوزاں ہے بَس مُجھے
مَیں بورِیا نشِیں سہی، لیکِن بہ فیضِ عِشق
حاصِل ہے مِہْر و ماہ پَہ بھی دَسترَس مُجھے
چشمِ زدَن میں جَست بھرُوں گا میں تا اُفق
کچھ کم نہیں ہے مُہلتِ یک دو نفَس مُجھے
میرے لِیے ہے حَلقۂ صاحِب دِلاں بہُت
پہچانتے ہیں لوگ یہاں پانچ دَس مُجھے
سَو بار میں نے عِشق میں قتلِ انا کِیا
آیا نہ اپنے آپ پَہ کوئی ترَس مُجھے
سب تن بدن میں جیسے کوئی آگ لگ گئی
دستِ حِنائی نے کِیا جس وقت مَس مُجھے
مرہَم کے باوجُود، نہ بھر پایا آج تک !
اُس نے دِیا تھا زخْم جو پِچھلے بَرَس مُجھے
اِک عُمر میں نے خُون سے سینچا ہے یہ چمن
کیوں کر نہ ہوں عزِیز سبھی خار و خس مُجھے
بعد از رِہائی بھی، نہ میں ساحِر رِہا ہُوا
یاد آنے لگ پڑی کوئی چوبِ قفس مُجھے
پرویز ساحِر
ایبٹ آباد، پاکستان