حفیظ ہوشیارپوری :::: پھر سے آرائشِ ہستی کے جو ساماں ہوں گے -- Hafeez Hoshiarpuri

[طارق شاہ]

غزلِ
حفیظ ہوشیار پوری​

پھر سے آرائشِ ہستی کے جو ساماں ہوں گے
تیرے جلووں ہی سے آباد شبستاں ہوں گے

عشق کی منزلِ اوّل پہ ٹھہرنے والو !
اِس سے آگے بھی کئی دشت و بیاباں ہوں گے

تو جہاں جائے گی غارت گرِ ہستی بن کر !
ہم بھی اب ساتھ تِرے گردشِ دوراں ہوں گے

کِس قدر سخت ہے، یہ ترک و طلب کی منزل
اب کبھی اُن سے مِلے بھی تو پشیماں ہوں گے

تیرے جلووں سے جو محرُوم رہے ہیں اب تک
وہی آخر تِرے جلووں کے نِگہباں ہوں گے

حفیظ ہوشیار پوری
​

 

[فرخ منظور]

پھر سے آرائشِ ہستی کے جو ساماں ہوں گے
تیرے جلووں ہی سے آباد شبستاں ہوں گے

عشق کی منزلِ اوّل پہ ٹھہرنے والو
اس سے آگے بھی کئی دشت و بیاباں ہوں گے

تو جہاں جائے گی غارتِ گرِ ہستی بن کر
ہم بھی اب ساتھ ترے گردشِ دوراں ہوں گے

کس قدر سخت ہے یہ ترک و طلب کی منزل
اب کبھی ان سے ملے بھی تو پشیماں ہوں گے

تیرے جلووں سے جو محروم رہے ہیں اب تک
وہی آخر ترے جلووں کے نگہباں ہوں گے

اب تو مجبور ہیں پر حشر کا دن آنے دے
تجھ سے انصاف طلب روئے گریزاں ہوں گے

جب کبھی ہم نے کیا عشق، پشیمان ہوئے
زندگی ہے تو ابھی اور پشیماں ہوں گے

کوئی بھی غم ہو غمِ دل کہ غمِ دہر حفیظؔ
ہم بہ ہر حال بہ ہر رنگ غزل خواں ہوں گے

(حفیظ ہوشیار پوری)​

 

[کاشف اختر]

واہ ! انتخاب خوب ہے ۔ کیا کسی نے گایا بھی ہے ؟؟؟

 

[محمد خلیل الرحمٰن]

واہ ! انتخاب خوب ہے ۔ کیا کسی نے گایا بھی ہے ؟؟؟

اس غزل کے بارے میں تو علم نہیں البتہ اسی بحر میں مومن کی ایک مشہور غزل ہے جسے مہدی حسن نے بہت خوبصورت انداز میں گایا ہے۔


مومن - ناوک انداز جدھر دیدہء جاناں ہوں گے - حکیم مومن خان مومن

 

[کاشف اختر]

بہت شکریہ محمد خلیل الرحمٰن صاحب