فیض :::: پھر وہی جاں بہ لبی لذّتِ مے سے پہلے

[طارق شاہ]

​

غزلِ​

فیض احمد فیض ​

​

شرح بے دردیِ حالات نہ ہونے پائی ​

اب کے بھی دل کی مدارات نہ ہونے پائی ​

​

پھر وہی وعدہ جو اقرار نہ ہونے پایا ​

پھر وہی بات جو اثبات نہ ہونے پائی ​

​

پھر وہ پروانے جنہیں اذنِ شہادت نہ مِلا ​

پھر وہ شمعیں کہ جنہیں رات نہ ہونے پائی ​

​

پھر وہی جاں بہ لبی لذّتِ مے سے پہلے ​

پھر وہ محفل جو خرابات نہ ہونے پائی ​

​

پھر دَمِ دِید رہے چشم ونظر دِید طلب ​

پھر شبِ وصْل مُلاقات نہ ہونے پائی ​

​

پھر وہاں بابِ اثر جانئے کب بند ہُوا ​

پھر یہاں ختم مناجات نہ ہونے پائی ​

​

فیض سر پر جو ہر اِک روز قیامت گُزری ​

ایک بھی روزِ مکافات نہ ہونے پائی ​

​

فیض احمد فیض ​

​

 

[مہدی نقوی حجاز]

بہت خوب حضرت۔
فیض صاحب کی نئی غزل (ہمارے لیے) سے مستفید فرمانے کا شکریہ!

 

[طارق شاہ]

بہت خوب حضرت۔
فیض صاحب کی نئی غزل (ہمارے لیے) سے مستفید فرمانے کا شکریہ!

تشکّر جناب اس اظہار خیال اور پذیرائی انتخاب پر ۔ فیض صاحب کی کیا بات ہو۔

متخبہ غزل، فیض صاحب کی سرِ وادیِ سِینا سے لی ہے
تشکّر پھر سے بہت خوش رہیں