پیروڈی: آگیا تھا وہ خوش خصال پسند

[عاطف ملک]

محمداحمد بھائی کی ایک انتہائی خوبصورت غزل کے ساتھ ہماری محبت تمام محفلین بالخصوص استادِ محترم الف عین کی خدمت میں:

"آگیا تھا وہ خوش خصال پسند"
تھی جسے صرف مسڈ کال پسند

فون پر ملتفت نہ ہوتا تھا
عشق بھی تھا اسے حلال پسند

ہم کو قاتل ادائیں اس کی عزیز
اس کو بندوق کی ہے نال پسند

سب سے ہی بے سبب الجھتی ہے
جانِ جاں میری اشتعال پسند

تو کہ ماما کا پھول سا بے بی
میں جسے تیری دیکھ بھال پسند

سالسا اور کتھک اسے مرغوب
ہم کو بھنگڑا پسند، دھمال پسند

بھون کر اس کو کھانا چاہتا ہوں
آج آیا ہے اک غزال پسند

حیف! بدقسمتی وہ شیریں کی
ہائے فرہاد تھا کدال پسند

جی حضوری ہماری جو نہ کریں
ہم کو آتے ہیں خال خال پسند

اس کو محبوب میری تشنہ لبی
مجھ کو شبنم سے اس کے گال پسند

خواہشِ عین وصلِ یار نہیں
ہم کو اس بت کا بس خیال پسند

عینؔ میم
مارچ ۲۰۱۹​

 

[محمد خلیل الرحمٰن]

مزے دار مزے دار!!!

 

[سید شہزاد ناصر]

ہم کو قاتل ادائیں اس کی عزیز
اس کو بندوقچی کی نال پسند

سرخ کشیدہ کافی قابل اعتراض ہے
باقی غزل بہت خوب ہے

 

[محمد عدنان اکبری نقیبی]

اس کو محبوب میری تشنہ لبی
مجھ کو شبنم سے اس کے گال پسند

السلام علیکم عاطف بھیا ،
وہ کیا خوب ہنستی مسکراتی صبح کی ابتداء فرمائی ہے ۔
کیا بہتریں پیروڈی کی ہے ، واہ جناب ۔
سلامت رہیں ۔

 

[محمد خلیل الرحمٰن]

سرخ کشیدہ کافی قابل اعتراض ہے
باقی غزل بہت خوب ہے

متفق

 

[عاطف ملک]

مزے دار مزے دار!!!

شکریہ استادِ محترم

سرخ کشیدہ کافی قابل اعتراض ہے
باقی غزل بہت خوب ہے

تدوین کر دی۔
نشاندہی کا شکریہ

السلام علیکم عاطف بھیا ،
وہ کیا خوب ہنستی مسکراتی صبح کی ابتداء فرمائی ہے ۔
کیا بہتریں پیروڈی کی ہے ، واہ جناب ۔
سلامت رہیں ۔

وعلیکم السلام،
خوش رہیں عدنان بھائی۔
مسکراتے رہیں

سرگوشی

صبح صبح اٹھ کے بھابھی کیلیے ناشتہ اور چائے خود تیار کیا کریں۔ساری صبحیں خوشگوار اور ہنستی مسکراتی گزریں گی

متفق

 

[محمد وارث]

خوب پیروڈی ہے ڈاکٹر صاحب، بہت خوب۔

 

[محمد وارث]

اور اس بہتی گنگا میں ہم بھی ہاتھ دھو لیں

چار ہی شادیوں کا ہے مجھے شوق
سینہ تانے میں ہوں حلال پسند

 

[فلسفی]

چار ہی شادیوں کا ہے مجھے شوق
سینہ تانے میں ہوں حلال پسند

یاد رکھیے گا ہم نے آپ نے آپ سے کچھ سال بعد پوچھنا ہے کہ شوق برقرار ہے کہ نہیں۔

 

[عرفان سعید]

بہت عمدہ پیروڈی ہے عاطف بھائی!

 

[عظیم]

کیا بات ہے عاطف بھائی!
ہم کو بھنگڑا پسند، دھمال پسند
معاف کیجیے گا 'پسند' کا دال میرے خیال میں تقطیع میں آئے گا۔ یہاں کچھ گڑبڑ سی محسوس ہو رہی ہے۔ اصلاح سخن میں نہ ہونے کے باوجود بھی یہ لکھ رہا ہوں۔
اس کے علاوہ ایک ابا بننے والی پیروڈی بھی پوسٹ کی تھی یہاں آپ نے، اس کا مصرع مجھے تھوڑا سا یاد ہے
مانتی ہی نہیں ہے عاطف وہ
شاید ایسا ہی تھا، لیکن مانیں؟

 

[الف عین]

واہ، مزے کی پیروڈی ہے محمداحمد کو بھی
آ ہی جائے گا یہ خیال پسند
حلال کا قافیہ خوب حلال کیا ہے عاطف ملک اور محمد وارث نے

 

[عبدالقیوم چوہدری]

ودھیا ڈاکٹر صاحب۔ پڑھ کر سواد آ گیا۔

 

[یاسر شاہ]

واہ بہت خوب -بڑیا پیروڈی -

آخری شعر سمجھ نہ سکا خصو صاً پہلا مصرع اور پسند کے وزن کی بات تو عظیم صاحب نے کر دی -

ایک بات تو فرمائیے ،کہاں تو ابتدا ئے غزل میں مسڈ کال اور عدم التفات کی شکایت،یہ ایک دم سے بے بی کہاں سے آگیا ؟

تو کہ ماما کا پھول سا بے بی
میں جسے تیری دیکھ بھال پسند

 

[محمداحمد]

بہت خوب عاطف بھائی!

"آگیا تھا وہ خوش خصال پسند"
تھی جسے صرف مسڈ کال پسند

فون پر ملتفت نہ ہوتا تھا
عشق بھی تھا اسے حلال پسند

کیا کہنے!

 

[جاسمن]

مزیدار پیروڈی۔
بہت محنت سے اتنی خوبصورت پیروڈی پیش کی ہے۔
شاباش!

 

[لاریب مرزا]

واہ واہ!! بہت پُرلطف پیروڈی کی ہے۔ بہت سی داد آپ کے لیے۔

سب سے ہی بے سبب الجھتی ہے
جانِ جاں میری اشتعال پسند

 

[لاریب مرزا]

اور اس بہتی گنگا میں ہم بھی ہاتھ دھو لیں

چار ہی شادیوں کا ہے مجھے شوق
سینہ تانے میں ہوں حلال پسند

آپ نے بھی بہتی گنگا میں خوب ہاتھ دھوئے وارث بھائی۔

 

[محمد وارث]

آپ نے بھی بہتی گنگا میں خوب ہاتھ دھوئے وارث بھائی۔

کہاں ہاتھ دھوئے، بس ہاتھ دھونے کا ادھورا سا خواب ہی دیکھا ہے، تس پر بھی گھر بھر میں مٹی پلید ہوتی رہتی ہے!

 

[محمداحمد]

کہاں ہاتھ دھوئے، بس ہاتھ دھونے کا ادھورا سا خواب ہی دیکھا ہے، تس پر بھی گھر بھر میں مٹی پلید ہوتی رہتی ہے!

کسی کا شعر یاد آ گیا:

خواب ہوتے ہیں دیکھنے کے لئے
اِن میں جا کر مگر رہا نہ کرو