چھوڑ ڈالو کریدنا مجھ کو

[طالش طور]

سر الف عین
یاسر شاہ
محمّد احسن سمیع :راحل:
اور دیگر احباب سے اصلاح کی درخواست ہے

جب بھی چاہو گے جاننا مجھ کو
شیشۃِ دل میں دیکھنا مجھ کو

پاؤ گے تم مجھے خیالوں میں
ہو کے بے لوث سوچنا مجھ کو

تم نہ میری طرح بکھر جانا
اب نہ چاہو سمیٹنا مجھ کو

ہے جو فرصت تو پاس آ بیٹھو
کل نہ خوابوں میں ڈھونڈنا مجھکو

تم مجھے یوں سمجھ نہ پاؤ گے
چھوڑ ڈالو کریدنا مجھ کو

مجھ سے مانوس اس قدر نہ رہو
کل جو چاہو گے بھولنا مجھ کو

میں فقط کچھ غموں کا شاعر ہوں
تم بھی کچھ غم ہی سونپنا مجھ کو

جو بھی سوچوں میں کرب ہے طالش
ہے اکیلے ہی جھیلنا مجھ کو

 

[محمد احسن سمیع راحلؔ]

طالش بھائی اس غزل کے قوافی درست نہیں، دوبارہ دیکھ لیں.

 

[طالش طور]

طالش بھائی اس غزل کے قوافی درست نہیں، دوبارہ دیکھ لیں.

میرے خیال سے تو قوافی میں اتنی پابندی نہیں ہونی چاہئے راحل بھائی باقی سر الف عین ہی بہتر رائے دے سکتے ہیں
سر الف عین

 

[سعید احمد سجاد]

طالش بھائی اس غزل کے قوافی درست نہیں، دوبارہ دیکھ لیں.

راحل بھائی میں بھی سر الف عین کی رائے کا منتظر ہوں تا کہ اس بحث کی حتمی رائے سے استفادہ کر سکوں
سر الف عین

 

[محمد احسن سمیع راحلؔ]

قوافی کے باب میں اصول یہ ہے کہ اگر افعال سے بنائے جائیں تو صیغۂ امر کا اعتبار کیا جائے گا ۔۔۔ آپ کی غزل کے تمام قوافی ہی مصادر پر مشتمل ہیں ۔۔۔ مطلعے کو اگر دیکھیں تو آپ نے جاننا اور دیکھنا کو قافیہ بنایا ہے جن کے صیغۂ امر بالترتیب جان اور دیکھ ہیں جو کہ ظاہر ہے کہ ہم صوت نہیں ۔۔۔ جاننا کے ساتھ ماننا تو قافیہ ہوسکتا ہے، دیکھنا نہیں۔

 

[محمد احسن سمیع راحلؔ]

راحل بھائی میں بھی سر الف عین کی رائے کا منتظر ہوں تا کہ اس بحث کی حتمی رائے سے استفادہ کر سکوں
سر الف عین

یہ بحث محفل پر کئی بات دہرائی جا چکی ہے اور پرانے مراسلوں میں دیکھی بھی جا سکتی ہے۔

 

[سعید احمد سجاد]

یہ بحث محفل پر کئی بات دہرائی جا چکی ہے اور پرانے مراسلوں میں دیکھی بھی جا سکتی ہے۔

متفق ہوں راحل بھائی لیکن میرا خیال ہے کہ اگر چلنے دیا جائے تو قباحت بھی نہیں ہے

 

[محمد احسن سمیع راحلؔ]

متفق ہوں راحل بھائی لیکن میرا خیال ہے کہ اگر چلنے دیا جائے تو قباحت بھی نہیں ہے

قباحت کیسے نہیں سجاد بھائی ... اس طرح تو َایک ایک کر کے سب اصول و ضوابط چھوڑ دیے جائیں گے!

 

[محمد احسن سمیع راحلؔ]

پھر اس طریقے میں تو صوتی ہم آہنگی بھی نہیں، جو قافیہ کا اصل حسن اور مطلوب ہے۔

 

[یاسر شاہ]

طور صاحب قافیے واقعی درست نہیں جیسا کہ بھائی سمیع نے کہا۔
اب ایک جگاڑ کریں جس سے قافیے ٹھیک ہو جائیں گے۔ مطلع کے کسی ایک مصرع میں ایسا قافیہ لائیں جس کے آخر میں "نون الف" کی بجائے صرف "الف" آئے۔
مثال کے طور پہ شعر کی کوئی اس قبیل کی صورت نکالیں:

جب بھی چاہو گے جاننا مجھ کو
شیشۃِ دل میں دیکھنا مجھ کو

ہر جگہ ڈھونڈتے ہو کیا مجھ کو
شیشہ_دل میں دیکھنا مجھ کو

آگے اشعار میں بھی جس حد تک ہو سکے قافیوں کے آخر میں "نا" کی پابندی کے بجائے صرف "ا" کی پابندی رہنے دیں ۔مثلا ایسے قافیے فٹ کریں:
آئینہ ۔راستہ۔دیکھنا۔کیا۔برا۔ادا۔سوا۔ دل کشا وغیرہ وغیرہ۔ یوں غزل کی زمیں زرخیز ہو جائے گی اور بیچ میں آپ کے "دیکھنا"۔"ڈھونڈنا" وغیرہ قافیوں والے اشعار بھی چل جائیں گے مگر مطلع کے دونوں مصرعوں سے "نا" کی پابندی ختم کر دیں ۔



مزید یہ کہ:

تم نہ میری طرح بکھر جانا
اب نہ چاہو سمیٹنا مجھ کو

"بکھر جاو" کر دیں


ہے جو فرصت تو پاس آ بیٹھو
کل نہ خوابوں میں ڈھونڈنا مجھکو

یہاں بھی پہلا مصرع یوں چاہیے:
اب تو تم پاس بیٹھتے ہی نہیں

تم مجھے یوں سمجھ نہ پاؤ گے
چھوڑ ڈالو کریدنا مجھ کو

"چھوڑ ڈالو" کہنا ٹھیک نہیں۔ "چھوڑ دو اب" درست ہے۔

مجھ سے مانوس اس قدر نہ رہو
کل جو چاہو گے بھولنا مجھ کو

یہاں بھی اردو روزمرہ ٹھیک نہیں۔

 

[الف عین]

قوافی تو میں بھی غلط ہی مانتا ہوں، لیکن اس کی توجیہہ میں عروض دانوں سے مختلف طریقے پر کرتا ہوں۔ وہ یہ کہ درست قوافی میں مشترک حروف سے ما قبل حرف متحرک ہوتا ہے۔ ساکن نہیں۔ جاننا، ماننا درست قوافی ہیں کہ مشترکہ حروف اننا سے پہلے ج اور م پر زبر ہے، جانا، مانا بھی درست ہیں، کہ مشترک انا سے پہلے لیکن دیکھنا بھالنا میں نا مشترک سے پہلے کھ اور ل ساکن ہیں( اگرچہ دیکھ اور بھال بھی قوافی نہیں جو ان افعال کے مصادر یا صیغہ امریہ ہیں)۔ لیکن اگر مصدر نہ بھی ہوں، کوئی اسم بھی ہو، تو بھی قافیہ غلط ہی ہو گا