کاش ایسا کبھی ہو مرے دیس میں

[فیضان قیصر]

کاش ایسا کبھی ہو مرے دیس میں
لوگ نکلیں گھروں سے یہ کہتے ہوئے
آج اپنے مسیحاؤں کے واسطے
ہم ہمارے گھروں سے نکل ائے ہیں
اور سڑکوں پہ بیٹھے مسیحاؤں سے
لوگ بولیں سنو
ہم تمھاری جگہ دھرنا دینگے یہاں
اسپتالوں میں تم لوٹ جاؤ وہاں
منتظر ہیں تمھارے کئی غم زدہ
ہیں ملول و پریشاں، دکھی، بے خطا
صبحِ نو کا انھیں جاکے پیغام دو
جاؤ کارِ مسیحائی انجام دو.

 

[سلیم ستار]

فیضان صاحب، آپ کی اس نظم کا مرکزی خیال اور لب و لہجہ بہت اچھا ہے۔ مجھے یہ نظم بہت پسند آئی۔

ایک آدھ جگہ معمولی سی تبدیلی سے یہ شیشے سے ہیرے میں تبدیل ہو سکتی ہے، اگر کوئ استاد اس پر توجہ دیں تو۔

 

[محمد خلیل الرحمٰن]

کاش ایسا کبھی ہو مرے دیس میں
لوگ نکلیں گھروں سے یہ کہتے ہئے
آج اپنے مسیحاؤں کے واسطے
ہم ہمارے گھروں سے نکل ائے ہیں
اور سڑکوں پہ بیٹھے مسیحاؤں سے
لوگ بولیں سنو
ہم تمھاری جگہ دھرنا دینگے یہاں
اسپتالوں میں تم لوٹ جاؤ وہاں
منتظر ہیں تمھارے کئ غم زدہ
ہیں ملول و پریشاں دکھی بے خطا
صبحِ نو کا انھیں جاکر پیغام دو
جاؤ کارِ مسیحائی انجام دو.

فیضان قیصر بھائی خوبصورت نظم ہے ۔ یہ نظم بحور سے آزاد نثری شاعری ہرگز نہیں بلکہ باقاعدہ آزاد نظم ہے۔ ہم اسے اصلاح سخن کے زمرے میں منتقل کر رہے ہیں۔

 

[فیضان قیصر]

الف عین سر

 

[فیضان قیصر]

فیضان قیصر بھائی خوبصورت نظم ہے ۔ یہ نظم بحور سے آزاد نثری شاعری ہرگز نہیں بلکہ باقاعدہ آزاد نظم ہے۔ ہم اسے اصلاح سخن کے زمرے میں منتقل کر رہے ہیں۔

رہنمائی فرمانے کا بے حد شکریہ -

 

[فیضان قیصر]

فیضان صاحب، آپ کی اس نظم کا مرکزی خیال اور لب و لہجہ بہت اچھا ہے۔ مجھے یہ نظم بہت پسند آئی۔

ایک آدھ جگہ معمولی سی تبدیلی سے یہ شیشے سے ہیرے میں تبدیل ہو سکتی ہے، اگر کوئ استاد اس پر توجہ دیں تو۔

پسند کرنے کا اور رہنمائی کرنے کا بے حد شکریہ

 

[الف عین]

اچھی نظم ہے شاید کہیں ڈاکٹروں کی ہڑتال کے موضوع پر ۔
'ہم ہمارے گھروں' اچھا نہیں، 'ہم اپنے گھروں' درست محاورہ ہوتا ہے
دوسری خامی یہ لگی
ہم تمھاری جگہ دھرنا دینگے یہاں
دھرنا کے الف کا اسقاط گوارا نہیں، ترتیب بدل دیں
دیں گے دھرنا یہاں
باقی ٹھیک ہے

 

[فیضان قیصر]

اچھی نظم ہے شاید کہیں ڈاکٹروں کی ہڑتال کے موضوع پر ۔
'ہم ہمارے گھروں' اچھا نہیں، 'ہم اپنے گھروں' درست محاورہ ہوتا ہے
دوسری خامی یہ لگی
ہم تمھاری جگہ دھرنا دینگے یہاں
دھرنا کے الف کا اسقاط گوارا نہیں، ترتیب بدل دیں
دیں گے دھرنا یہاں
باقی ٹھیک ہے

بہت شکریہ سر- جی یہ پاکستان میں ڈاکٹرز کی ہرتال کے پس منظر میں ہی لکھی گئی تھی- آپ کی نشاندھی کے مطابق تبدیلیاں کر دی ہیں -

 

[فیضان قیصر]

الف عین اس طرح ٹھیک ہوجائے گا نا سر
ہم بھی اپنے گھروں سے نکل آئے ہیں

 

[الف عین]

الف عین اس طرح ٹھیک ہوجائے گا نا سر
ہم بھی اپنے گھروں سے نکل آئے ہیں

مجھے بھی یہی مصرع سوجھا تھا لیکن 'بھی' بھرتی کا لگا۔ شاید 'جو' ، 'بھی' کی بہ نسبت بہتر لگے