حسان خان
لائبریرین
تو وہ بت ہے کعبۂ دل ہے صنم خانہ ترا
شمعِ جاں افروز ہے تو، میں ہوں پروانہ ترا
عکسِ وحدت پردۂ کثرت میں ہے پرتو فگن
یہ طلسماتِ جہاں ہے آئینہ خانہ ترا
نقشبندِ دہر ہے پھر دونوں عالم سے الگ
رنگ ہے نیرنگِ ہستی سے جداگانہ ترا
رشکِ صد کانِ ملاحت موہنی مورت تری
غیرتِ حُسنِ بتاں اندازِ جانانہ ترا
نغمۂ نے ہے برائے اہلِ دل فردوسِ گوش
ولولہ خیزِ تصوف رقصِ مستانہ ترا
نقدِ جانِ عاشقاں صدقے ترے اعجاز پر
دل ہے بیعانہ ترا، ایمان نذرانہ ترا
بحرِ ہستی میں کنول کی طرح تر دامن نہیں
ہوشمندِ خود فراموشی ہے دیوانہ ترا
سب کی نظروں میں سماتا ہے بقدرِ شوقِ دید
چشمِ نظّارہ میں ہے جلوہ جداگانہ ترا
قطرہ قطرہ بن گیا خمخانۂ وحدت اثر
جوشِ مستی میں ذرا چھلکا تھا پیمانہ ترا
فلسفہ گیتا کا ہے دنیا میں کانِ معرفت
بند ہے کوزے میں دریائے روانِ معرفت
آئینہ عالم پہ تو نے رازِ عرفاں کر دیا
جلوۂ توحید کثرت میں نمایاں کر دیا
روئے روشن میں دکھا کر شانِ تنویرِ ازل
دہر کے ظلمت کدے کو جلوہ ساماں کر دیا
دے کے تعلیمِ حقیقت خیز عینِ ذات کی
ماسوا کا علم زیبِ طاقِ نسیاں کر دیا
بھر دیا نورِ جہاں افروز چشمِ شوق میں
خانۂ دل کو تجلی گاہِ عرفاں کر دیا
شانِ یکتائی کی تھی وہ تیرے جلوے میں جھلک
جس نے باطل امتیازِ کفر و ایماں کر دیا
راز کا پردہ اٹھا کر چہرۂ مقصود سے
حُسنِ معنی تو نے بے پردہ نمایاں کر دیا
عہدِ طفلی میں دکھا کر دہر کی نیرنگیاں
ثابت اِس دنیا کو بازی گاہِ طفلاں کر دیا
عالمِ اجسام میں بن کر سراپا نور کا
عرشِ اعلیٰ پر دماغِ بزمِ امکاں کر دیا
دَور دورہ مادّیت کا ہے پھر سنسار میں
خودنمائی کا دکھا جلوہ نئے اوتار میں
(برق دہلوی)
شمعِ جاں افروز ہے تو، میں ہوں پروانہ ترا
عکسِ وحدت پردۂ کثرت میں ہے پرتو فگن
یہ طلسماتِ جہاں ہے آئینہ خانہ ترا
نقشبندِ دہر ہے پھر دونوں عالم سے الگ
رنگ ہے نیرنگِ ہستی سے جداگانہ ترا
رشکِ صد کانِ ملاحت موہنی مورت تری
غیرتِ حُسنِ بتاں اندازِ جانانہ ترا
نغمۂ نے ہے برائے اہلِ دل فردوسِ گوش
ولولہ خیزِ تصوف رقصِ مستانہ ترا
نقدِ جانِ عاشقاں صدقے ترے اعجاز پر
دل ہے بیعانہ ترا، ایمان نذرانہ ترا
بحرِ ہستی میں کنول کی طرح تر دامن نہیں
ہوشمندِ خود فراموشی ہے دیوانہ ترا
سب کی نظروں میں سماتا ہے بقدرِ شوقِ دید
چشمِ نظّارہ میں ہے جلوہ جداگانہ ترا
قطرہ قطرہ بن گیا خمخانۂ وحدت اثر
جوشِ مستی میں ذرا چھلکا تھا پیمانہ ترا
فلسفہ گیتا کا ہے دنیا میں کانِ معرفت
بند ہے کوزے میں دریائے روانِ معرفت
آئینہ عالم پہ تو نے رازِ عرفاں کر دیا
جلوۂ توحید کثرت میں نمایاں کر دیا
روئے روشن میں دکھا کر شانِ تنویرِ ازل
دہر کے ظلمت کدے کو جلوہ ساماں کر دیا
دے کے تعلیمِ حقیقت خیز عینِ ذات کی
ماسوا کا علم زیبِ طاقِ نسیاں کر دیا
بھر دیا نورِ جہاں افروز چشمِ شوق میں
خانۂ دل کو تجلی گاہِ عرفاں کر دیا
شانِ یکتائی کی تھی وہ تیرے جلوے میں جھلک
جس نے باطل امتیازِ کفر و ایماں کر دیا
راز کا پردہ اٹھا کر چہرۂ مقصود سے
حُسنِ معنی تو نے بے پردہ نمایاں کر دیا
عہدِ طفلی میں دکھا کر دہر کی نیرنگیاں
ثابت اِس دنیا کو بازی گاہِ طفلاں کر دیا
عالمِ اجسام میں بن کر سراپا نور کا
عرشِ اعلیٰ پر دماغِ بزمِ امکاں کر دیا
دَور دورہ مادّیت کا ہے پھر سنسار میں
خودنمائی کا دکھا جلوہ نئے اوتار میں
(برق دہلوی)