کوئی نہیں پچھتانے والا - نوح ناروی

[کاشفی]

غزل
(نوح ناروی - 1879-1962، داغ دہلوی رحمتہ اللہ علیہ کے شاگرد)
کوئی نہیں پچھتانے والا
مر جائے مر جانے والا

محفل میں آئے گا کیوں کر
خلوت میں شرمانے والا

میں روکوں لیکن کیا روکوں
جائے گا گھر جانے والا

شکر خدا کا ہم کرتے ہیں
کام آیا کام آنے والا

صبر مرا بےکار نہ جائے
تڑپے وہ تڑپانے والا

اپنا دل بہلاؤں کس سے
ہے کون آنے جانے والا

وہ نہ ملیں مجھ کو مل جائے
کوئی جی بہلانے والا

دل وہ شے ہے جس کا شاکی
کھونے والا پانے والا

لطف و کرم فرماتا جائے
لطف و کرم فرمانے والا

سب سے مشکل بات یہی ہے
زندہ ہو مرجانے والا

کیا سمجھے اسرارِ محبت
دل دے کر پچھتانے والا

پھولوں کا مرجھانا دیکھے
کلیوں پر اترانے والا

جان مری ہے جانے والی
دل ہے ان پر آنے والا

یا میں ہوں یا میرا دل ہے
روز نیا غم پانے والا

نوح محبت کی دنیا میں
ہے طوفان اُٹھانے والا​

 

[arifkarim]

کیا اسکا تعلق ناروے سے تھا؟ ناروی؟

 

[طارق شاہ]

کیا سمجھے اسرارِ محبت
دل دے کر پچھتانے والا

دل وہ شے ہے جس کا شاکی
کھونے والا، پانے والا

سب سے مشکل بات یہی ہے !
زندہ ہو مرجانے والا