کوئی گرہ کشا نہیں

[عباد اللہ]

نغمۂ حزن کے سوا
تارِ نفس پہ کچھ نہیں
گوشۂ فکر میں ہمیں
جائے اماں نہیں ملی
سجدہ ء روزِ اولیں
ہیچ ہے اس کی داستاں
ہیچ ہیں تیرے خال و خد
گلشنِ ہست ہے عبث
موجۂ بادِ صبح سے
سرو و سمن سبک ہوئے
اب کے بہار میں یہاں
خود نگری کے نام پر
کھیل غضب کا ہے بپا
کیسی مہیب ہے گھٹا
خلقِ عظیم کا چلن
ہوش و خرد سے ماورا
لمحۂ التفات میں
یہ جو ہیں رنگ و نور سب
غارتِ کن کی زد پہ ہیں
زینۂ ارتقا سے اب
گر کے رہے گا یہ جہاں
منطقۂ حیات میں
گونج رہا ہے قہقہہ
سالک و پیر خوار ہیں
کوئی گرہ کشا نہیں
رقص کناں رہو میاں

 

[عباد اللہ]

ابن رضا بھیا

 

[عباد اللہ]

الف عین سر

 

[الف عین]

نغمہ حزن؟ نالہء حزن بہتر ہو گا شاید۔
داستاں کے لئے ’ہیچ‘ کی صفت کا استعمال بھی عجیب لگ رہا ہے۔
کھیل نہیں حشر بپا ہوتا ہے۔
باقی نظم درست ہے۔

 

[عباد اللہ]

آپ کیا اصلاح تجویز کیجئے گا راحیل فاروق سر

 

[عباد اللہ]

محمد فرقان بھیا

 

[فرقان احمد]

زینۂ ارتقا سے اب
گر کے رہے گا یہ جہاں
منطقۂ حیات میں
گونج رہا ہے قہقہہ
سالک و پیر خوار ہیں
کوئی گرہ کشا نہیں
رقص کناں رہو میاں

بہت اعلیٰ!

 

[عباد اللہ]

بہت اعلیٰ!

بہت شکریہ بھیا

 

[نور وجدان]

ہیچ ہیں تیرے خال و خد

اس مصرعے میں کس کے خال و خد کو ہیچ کہا گیا ہے اس کی سمجھ نہیں آئی۔۔۔۔ باقی نظم بہت خوب لگی ہے

 

[عباد اللہ]

اس مصرعے میں کس کے خال و خد کو ہیچ کہا گیا ہے اس کی سمجھ نہیں آئی۔۔۔۔ باقی نظم بہت خوب لگی ہے

کچھ حصہ قاری کا بھی ہوتا ہے
جس کے خدو خال آپ کو ہیچ معلوم ہوں اسی پر قیاس کر لیجئے