کیا غمِ جاں اور کیا غمِ جاناں سب کے محرمِ راز ہوئے - مختار صدیقی

[فرخ منظور]

کیا غمِ جاں اور کیا غمِ جاناں سب کے محرمِ راز ہوئے
اب مجبورِ نوا بھی نہیں ہیں اب تو پردہء ساز ہوئے

خوئے فراق ہی آڑے آئی آخر ہم مجبوروں کے
میل ملاپ پہ قادر جب سے آپ ایسے دم باز ہوئے

لازم ہے درویش کی خاطر پردہ دنیا داری کا
ورنہ ہم تو فقیر ہیں جب سے یار زمانہ ساز ہوئے

شعر و سخن، سامانِ جنوں کیا، کوہکنی درویشی کیا
قیدِ حیات میں درد کے مارے رہے تو حیلہ ساز ہوئے

آج غزل کی صورت میں جو آپ کے سامنے آئے ہوئے
کن جتنوں سے یہ خون کے قطرے اب تک پس انداز ہوئے

(مختار صدیقی)

 

[محمد وارث]

بہت خوب، کیا لا جواب غزل ہے، شکریہ جناب شیئر کرنے کیلیئے!

 

[فرخ منظور]

بہت شکریہ وارث صاحب، نبیل اور ملائکہ!

 

[فرخ منظور]

یہی غزل شاہدہ پروین کی آواز میں سنیے۔