کیسے پرلطف ہوا کرتے تھے وہ پیار کے دن(غزل)

[محمد اسامہ سَرسَری]

دل پہ قابو جو نہیں رہتا ہے دیدار کے دن​

لفظ بھی ساتھ نہیں دیتے ہیں اظہار کے دن​

روز مسکان سجاتے ہیں ہمیں دیکھ کے جو​

کرتے اعراض ہیں پھر کیوں مرے اقرار کے دن​

وصلِ احباب تو موسم پہ بھی رکھتا ہے اثَر​

کیسی دلشاد فضا ہوتی ہے اتوار کے دن​

پھر تو دو چند ہو یہ عید ، جو محبوب ہمیں​

آکے خود ’’عید مبارک‘‘ کہے تہوار کے دن​

رات ساری انھی سوچوں میں گزر جاتی ہے​

کیسے پرلطف ہوا کرتے تھے وہ پیار کے دن​

ہجر کی تیغِ جفا کھاکے ہمیں یاد آیا​

قیس و لیلیٰ کا زمانہ ، وہی تلوار کے دن​

سَرسَرؔی سی نظر اک بار پڑی تھی ان پر​

اب گزرتے نہیں اُس دید کے بیمار کے دن​

 

[محمد اسامہ سَرسَری]