حسان خان
لائبریرین
گدازِ دل سے باطن کا تجلی زار ہو جانا
محبت اصل میں ہے روح کا بیدار ہو جانا
نویدِ عیش سے اے دل ذرا ہشیار ہو جانا
کسی تازہ مصیبت کے لئے تیار ہو جانا
وہ اُن کے دل میں شوقِ خود نمائی کا خیال آنا
وہ ہر شے کا تبسم کے لئے تیار ہو جانا
مزاجِ حُسن کو اب بھی نہ سمجھو تو قیامت ہے
ہمارا اور وفا کے نام سے بیزار ہو جانا
سحر کا اُس طرف انگڑائی لینا دلفریبی سے
اِدھر شاعر کے محسوسات کا بیدار ہو جانا
توسّل سے ترے دل میں بھروں گا قوتیں برقی
ذرا میری طرف بھی اے نگاہِ یار ہو جانا
وہ آرایش میں سب قوت کسی کا صرف کر دینا
تحمل میں وہ ہر کوشش مری بیکار ہو جانا
معاذ اللہ اب یہ رنگ ہے دنیا کی محفل کا
خدا کا نام لینا اور ذلیل و خوار ہو جانا
رگوں سے خون سارا زہر بن کر پھوٹ نکلے گا
ذرا اے جوش ضبطِ شوق سے ہشیار ہو جانا
(جوش ملیح آبادی)
