گُلہائے عشق اور گُلِ سوسنِ خلوص - از: صابر عظیم آبادی

[کاشفی]

نعتِ رحمت العالمین صلی اللہ علیہ وسلم
(صابر عظیم آبادی)
گُلہائے عشق اور گُلِ سوسنِ خلوص
آئے نبی تو مہکا ہر اک گلشنِ خلوص

کرنے لگا ہوں جب سے محمد صلی اللہ علیہ وآلہ وسلم کی پیروی
محفوظ ہے شرر سے مرا خرمنِ خلوص

لہرائے کیوں نہ بادِ صبا میرے ارد گرد
مہکا ہوا ہے بوئے نبی سے تنِ خلوص

دستِ خلوص اپنا نبی کی طرف بڑھا
بنتا ہے روشنی کا سبب روزنِ خلوص

ظلم و ستم قریش کا سہنے کے باوجود
چھوڑا مرے نبی نے کہاں دامنِ خلوص

احسان آپ کا ہے بہت اس غلام پر
پھر کیوں کہوں نہ آپ کو میں محسنِ خلوص

ہے آپ ہی کے دم سے مرا قد بڑھا ہوا
ہے آپ ہی سے اونچی مری گردنِ خلوص

مانگوں گا پھر انہیں سے محبت کی بھیک میں
وہ مصدر خلوص ہیں وہ مخزنِ خلوص

صابر مرا خلوص تھا محتاجِ فن مگر
سیکھا ہے میں نے عشقِ نبی سے فنِ خلوص
صلی اللہ علیہ وآلہ وسلم​