مصطفیٰ زیدی ہر اک نے کہا : کیُوں تجھے آرام نہ آیا ۔ مصطفیٰ زیدی

[فرخ منظور]

ہر اک نے کہا : کیُوں تجھے آرام نہ آیا
سُنتے رہے ہم ، لب پہ ترا نام نہ آیا

دیوانے کو تکتی ہیں ترے شہر کی گلیاں
نِکلا ، تو اِدھر لَوٹ کے بدنام نہ آیا

مت پُوچھ کہ ہم ضبط کی کِس راہ سے گُزرے
یہ دیکھ کہ تُجھ پر کوئی اِلزام نہ آیا

کیا جانیے کیا بیت گئی دِن کے سفر میں
وُہ مُنتظَرِ شام سرِ شام نہ آیا

یہ تِشنگیاں کل بھی تھیں اور آج بھی ، زیدی
اُس ہونٹ کا سایہ بھی مرے کام نہ آیا

مصطفیٰ زیدی

گریباں​

 

[فرخ منظور]

یہی غزل گل بہار بانو کی آواز میں

 

[آصف جسکانی]

السلام علیکم دوستو کیوں نا یہی غزل مستنصر حسین تارڑ کی میزبانی میں سنیں ( محفل بھی یہ ہی ہے ، گائیک بھی گلبہار جی ہیں )