اسد قریشی
محفلین
کرتا رہا شام و سحر، ہر رہگزر گردِسفر
میرا یہی رختِ سفر، ہر رہگزر گردِسفر
تجھ سے تھی اُمیدیں بہت، تب ہی کھِلایا زخمِ دل
اے چارہ گر جاوں کدھر، ہر رہگزر گردِسفر
تعبیر آنکھوں میں لئے صحرا بہ صحرا پھر چُکا
تو ہی بتا اے خواب گر، ہر رہگزر گردِسفر
تو جستجو کا راہبر، منزل سے تُجھ کو کام کیا
منزل کو کر صرفِ نظر، ہر رہگزر گردِسفر
مہمیز کرتی ہیں ترا شوقِ سفر ناکامیاں
قریہ بہ قریہ، در بہ در، ہر رہگزر گردِسفر
کاندھے پہ ڈالے منزلیں، پیروں میں ہے بانگِ جرس
ایسے میں ہو کس کو خبر، ہر رہگزر گردِسفر
ذوقِ جنونِ آگہی، ہر سُو خرد پر چھا گیا
ہوتی رہی ہر رہگزر، ہر رہگزر گردِسفر
اے کاتبِ تقدیر میری زیست کے اوراق پر
لکھ دے تو بس عزمِ سفر، ہر رہگزر گردِسفر
اسد
