ہم سنگ رہگزرنہ کسی آسماں کے ہیں

[Atif Chauhdary]

طرحی غزل

ہم سنگ ِ رہگزر نہ کسی آستاں کے ہیں
ٹھوکر کوئ بتائے تو آخر کہاں کے ہیں

وہ پھول ہیں جو آنکھ سے اوجھل کہیں کھلے
ہم رنگ نو بہار نہ صحن ِ خزاں کے ہیں

دیوار چنتے رہتے ہیں شام و سحر کوئی
کچھ لوگ جو یہ تیرے مرے درمیاں کے ہیں

ان آندھیوں نے رات کسے در بدر کیا
تنکے یہ رہگزار پہ کس آ شیاں کے ہیں

اک موج ِبے کنار ہمیں لے گئی کہیں
اب کشتیوں کے ہیں نہ کسی بادباں کے ہیں

گمگشتگانِ عشق ہیں مسکن نہ پوچھئے
ہم لوگ اس زمیں کے نہ اب آسماں کے ہیں

مانے گا کون دوستو کردار ھم بھی تھے
چرچے تمام شہر میں جس داستاں کے ہیں

آئے گی ہم کو دیکھ کے گزرے ہوؤں کی یاد
ہم نقش پا ہیں اور کسی کارواں کے ہیں

عاطف کہاں رکیں گے ہمیں کچھ خبر نہیں
ذرے ہوا کے دوش پہ ریگ ِ رواں کے ہیں

عاطف چوھدری