ہم نے ڈالی ہے نئی ایک روانی کی طرح

[راحیل فاروق]

تنگ ندی کے تڑپتے ہوئے پانی کی طرح
ہم نے ڈالی ہے نئی ایک روانی کی طرح

ڈھلتے ڈھلتے بھی غضب ڈھائے گیا ہجر کا دن
کسی کافر کی جنوں خیز جوانی کی طرح

ایسی وحشت کا برا ہو کہ ہم اپنے گھر سے
گم ہوئے خود بھی محبت کی نشانی کی طرح

ننگے سچ قابلِ برداشت کہاں ہوتے ہیں؟
واقعہ کہیے تو کہیے گا کہانی کی طرح

پاس رکھیں تو ملال، آگ لگائیں تو ملال
دل بھی ہے کیا کسی تصویر پرانی کی طرح

عشق ہے مدرسۂِ زیست کی اکھڑی ہوئی اینٹ
ہمہ دانی کی طرح، ہیچ مدانی کی طرح

یہ غزل حضرتِ راحیلؔ کی ہے، دھیان رہے
آپ پوشیدہ ہیں لفظوں میں معانی کی طرح

راحیلؔ فاروق
۴ اکتوبر، ۲۰۱۶ء​

 

[محمد تابش صدیقی]

واہ واہ راحیل بھائی۔ کیا کہنے

ننگے سچ قابلِ برداشت کہاں ہوتے ہیں؟
واقعہ کہیے تو کہیے گا کہانی کی طرح

لیکن آپ کہہ گئے کسی پردے کے بغیر

یہ غزل حضرتِ راحیلؔ کی ہے، دھیان رہے
آپ پوشیدہ ہیں لفظوں میں معانی کی طرح

میں تو پہلے ہی کہہ چکا ہوں

بندہ نام پڑھے بغیر بھی غزل پڑھے تو پتہ چل جائے راحیل بھائی کی ہے۔

 

[سید عاطف علی]

بھئی واہ ۔ خوب طرح ڈالی ہے ۔راحیل ۔
بہت پسند آئی ۔

 

[محمداحمد]

خوبصورت غزل ہے راحیل بھائی!

بہت عمدہ اور بہت خوبی سے نبھائی گئی ردیف!

خاکسار کی جانب سے ڈھیروں داد قبول فرمائیے۔

 

[الف عین]

بہت سی داد۔ ماشاء اللہ اچھی غزل ہے

 

[آوازِ دوست]

پاس رکھیں تو ملال، آگ لگائیں تو ملال
دل بھی ہے کیا کسی تصویر پرانی کیطرح

واہ!!!! بہت خوب

 

[محمد وارث]

لاجواب۔ کیا ہی اچھی غزل ہے قبلہ، بہت خوب۔

 

[ابو ہاشم]

ننگے سچ قابلِ برداشت کہاں ہوتے ہیں؟
واقعہ کہیے تو کہیے گا کہانی کی طرح

کیا یہ دونوں مصرعے ہم وزن ہیں؟

 

[محمد تابش صدیقی]

کیا یہ دونوں مصرعے ہم وزن ہیں؟

جی

 

[حمیرا عدنان]

بہت خوب راحیل بھائی

 

[صفی حیدر]

ہم نے ڈالی ہے نئی ایک روانی کی طرح

بے شک ۔۔۔۔۔ لاجواب، رواں دواں کلام ہے ۔۔۔۔ ہمیشہ کی طرح ۔۔۔۔۔۔۔۔

 

[راحیل فاروق]

واہ واہ راحیل بھائی۔ کیا کہنے

بہت شکریہ، تابش بھائی۔

میں تو پہلے ہی کہہ چکا ہوں

میں بھی پہلے کہہ چکا ہوں، بھائی۔

بہت شکریہ، بھائی۔ آپ کی کچھ آرا کو میں تعلی کی غرض سے جا بجا نقل کرتا رہتا ہوں۔ پتا چلے تو برا مت مانیے گا!

بھئی واہ ۔ خوب طرح ڈالی ہے ۔راحیل ۔
بہت پسند آئی ۔

آپ کو پسند آنے کا مطلب ہے سند مل گئی!

خاکسار کی جانب سے ڈھیروں داد قبول فرمائیے۔

خاکسار کی داد قبول کی گئی۔ آپ کی کہاں ہے؟

بہت سی داد۔ ماشاء اللہ اچھی غزل ہے

آداب، استاذی!

پاس رکھیں تو ملال، آگ لگائیں تو ملال
دل بھی ہے کیا کسی تصویر پرانی کیطرح

واہ!!!! بہت خوب

آپ کی ڈی پی پر صادق آتا ہے یہ شعر۔ بہت شکریہ!

لاجواب۔ کیا ہی اچھی غزل ہے قبلہ، بہت خوب۔

عنایت، وارث بھائی۔

سرگوشی

آپ اچھے شاعر ہیں، بھئی۔ ہماری اتنی غزلیں پڑھ کر بھی کان پر جوں نہیں رینگتی؟

بہت خوب راحیل بھائی

بہت شکریہ، چھوٹی آپا۔ اب تو آپ غالبؔ کی طرف دار ہو گئی ہیں۔ آپ سے داد وصولنے کا مزا آنے لگا ہے۔

بے شک ۔۔۔۔۔ لاجواب، رواں دواں کلام ہے ۔۔۔۔ ہمیشہ کی طرح ۔۔۔۔۔۔۔۔

آپ کی محبت، صفی بھائی۔

 

[سید لبید غزنوی]

خوبصورت غزل ہے راحیل بھائی!

بہت عمدہ اور بہت خوبی سے نبھائی گئی ردیف!

خاکسار کی جانب سے ڈھیروں داد قبول فرمائیے۔

 

[ٹرومین]

بہت خوب صورت غزل ہے۔
اللہ کرے زور قلم اور زیادہ

 

[محمد تابش صدیقی]

اللہ کرے زور قلم اور زیادہ

کاغذ کی دوسری طرف سے باہر نہ نکل جائے۔

 

[رومانہ چوہدری]

ردیف اچھی ہے۔ تین اشعار بہت پیارے ہیں باقی بھرتی ہے۔

 

[ٹرومین]

کاغذ کی دوسری طرف سے باہر نہ نکل جائے۔

یعنی کاغذ کی دوسری طرف ایک اور شاہکار غزل وجود میں آئے گی؟

 

[ڈاکٹرعامر شہزاد]

لاجواب اور شاندار ۔۔ مزہ آ گیا

 

[محمدابوعبداللہ]

بہت خوب

پاس رکھیں تو نہال دور جو رکھیں تو ملال
بیوی بھی کاش کہ ہوتی جو فلانی کی طرح

 

[ابو ہاشم]

تنگ ندی کے تڑپتے ہوئے پانی کی طرح
ہم نے ڈالی ہے نئی ایک روانی کی طرح

کیا چیز نئی ڈالی ہے پتا نہیں چلتا اس شعر سے

ویسے اچھی غزل کہی ہے