ہنے ہنے - سلیم پاشا

[شمشاد]

ہنے ہنے میں بھریا اے گھٹ
نکیاں نکیاں سدھراں دا
ہنے ہنے میں ویکھیا اے منظر
نویاں نویاں قبراں دا

ہنے ہنے ای سی چانن ٹُریا
انھ ہنیری بُکل چُوں
ہنے ہنے ای شام دی لالی
نکلی کالے بدل چُوں

ہنے ہنے ہے سانبھ لیا
اِک رُکھ نے اپنیاں چھانواں نوں
ہنے ہنے اِک رتّا سورج
دے گیا اوٹ نگاہواں نوں

ہنے ہنے میں ویکھ رہیا ساں
اُچے جہے اِک کھنڈر نوں
ہنے ہنے میں توبہ کیتی
ویکھ کے اپنے اندر نوں
(سلیم پاشا)