ہوا کے واسطے اِک کام چھوڑ آیا ہوں

[Wasiq Khan]

غزل
اعجاز رحمانی

ہوا کے واسطے اِک کام چھوڑ آیا ہوں
دِیا جلا کے سرِشام چھوڑ آیا ہوں

امانتِ سحر و شام چھوڑ آیا ہوں
کہیں چراغ، کہیں جام چھوڑ آیا ہوں

کبھی نصیب ہو فُرصت تو اُس کو پڑھ لینا
وہ ایک خط جو تیرے نام چھوڑ آیا ہوں

ہوائے دشت و بیاباں بھی مُجھ پہ برہم ہے
میں اپنے گھر کے دروبام چھوڑ آیا ہوں

کوئی چراغ سرِ راہگزر نہیں، نہ سہی
میں نقشِ پا تو بہرگام چھوڑ آیا ہوں

ابھی تو اور بہت اس پہ تبصرے ہونگے
میں گفتگو میں جو ابہام چھوڑ آیا ہوں

یہ کم نہیں ہے وضاحت میری اسِیری کی
پروں کے رنگ، تہہِ دام چھوڑ آیا ہوں

وہاں سے ایک قدم بھی نہ بڑھ سکی آگے
جہاں پہ گردشِ ایّام چھوڑ آیا ہوں

مُجھے جو ڈھونڈنا چاہے وہ ڈُھونڈ لے اعجازؔ
کہ اب میں کوچۂ گُمنام چھوڑ آیا ہوں​

 

[الف عین]

اچھی غزل ہے، لیکن شاعر کون ہے؟ کم از کم میں تو نہیں ہوں، اس کا تو مجھے یقین ہے!!

 

[محمد ظہیر انور]

اچھی غزل ہے، لیکن شاعر کون ہے؟ کم از کم میں تو نہیں ہوں، اس کا تو مجھے یقین ہے!!

اعجاز رحمانی

 

[محمد خلیل الرحمٰن]

اعجاز رحمانی

تدوین کردی ہے۔