یوسف سلطان
محفلین
ہووے پئی تقصیر کسے دی دُکھ پیا کوئی جردائے
بُھل چُک ہوندی اکھیاں کولوں دل جرمانے بھردائے
چین کسے تھاں لین نہ دیوے چنگا چیتر چڑھیائے
دُھپے چنکاں مارن لگدائے چھاویں جُثہ ٹھردائے
ملک عدم توں ننگے پنڈے آوندائے ایسے جہانے
بندہ اک کفن دی خاطر کناں پینڈا کردائے
منیاں میں اخلاص جیہی ہن سستی چیز نہ کوئی
اوہو کُجھ میں لے کے آیاں جو کُجھ مینوں سَردائے
خبر کوئی اخباراں وچ نئیں اِس دے بارے ویکھی
نئیں معلوم گوانڈی میرا جیوندا اے یا مردائے
انور ایویں چھوہیائے اپنا قصہ درداں والا
نیندر سب نوں مِٹھی لگدی کون ہنگارا بھردائے
انور مسعود
