ہے فلک تلے مرا گھر مگر مرے واسطے ہیں فلک بریں

[loneliness4ever]

السلام علیکم


ہے فلک تلے مرا گھر مگر مرے واسطے ہیں فلک بریں
مری نسبتیں ہیں علی تلک مرے رابطے ہیں فلک بریں

اے حسیں جہاں تری خو نہیں مری آنکھ میں تو رہا نہیں
مری جستجوہیں علی حسیں، مرے واسطے ہیں فلک بریں

تری محفلوں میں لگا نہیں مرا دل کبھی اے جہان سن
مری خلوتیں مری انجمن، مرے رابطے ہیں فلک بریں

مرے واسطے ہیں گلاب سی مری زندگی کی یہ مشکلیں
میں ہوں کربلا کے شہید سے مرے حوصلے ہیں فلک بریں

کبھی خسروی کبھی سروری اسی جستجو میں رہا جہاں
مری آرزو مرے مصطفے مرے راستے ہیں فلک بریں


س ن مخمور

بحر کے اراکین
متفاعلن متفاعلن متفاعلن متفاعلن

 

[الف عین]

کئی مصرعوں میں خیال کا پتہ نہیں چلتا کہ کیا کہنا چاہتے ہیں مخمور۔
اس کے علاوہ قوافی میں ایطا بھی ہے۔
کئی جگہ واسطے، رابطے قوافی ہیں جو ’طے‘ کو ردیف میں شامل کر دیتے ہیں، لیکن آگے حوصلے اور راستے بھی ہے۔ جس سے پتہ چلتا ہے کہ محض ’ے‘ پر ختم ہونے والے قوافی ہیں۔ اس لئے قوافی بدلنے کی ضرورت ہے۔ ہر جگہ محض ے پر ختم ہونے والے قوافی استعمال کئے جائیں۔
ردیف کے بارے میں پہلے بھی کہہ چکا ہوں کہ گنجلک ردائف سے بچنا چاہئے۔