یَا وَارِثَ الحُسَینِ تُنَا دِیکَ کَربَلا - علامہ السید ذیشان حیدر جوادی

[کاشفی]

یَا وَارِثَ الحُسَینِ تُنَا دِیکَ کَربَلا​

(علامہ السید ذیشان حیدر جوادی )​

​

بدلی ہے ایسی عالم اسلام کی فضا​

ایمان کا چمن ہے نہ کردار کی ہوا​

​

ہر غم ہے لاعلاج تو ہر درد لادوا​

اب مرکز فساد ہے بغداد و سامرہ​

​

یَا وَارِثَ الحُسَینِ تُنَا دِیکَ کَربَلا​

​

ظلم و جفا و جور کا ہے ایسا سلسلہ​

دینِ خدا ہے کربِ مسلسل میں مبتلا​

​

ہوتی ہے ہر یزید کی تائید برملا​

طوفان شرک سرحد بصرہ تک آچکا​

​

یَا وَارِثَ الحُسَینِ تُنَا دِیکَ کَربَلا​

​

خطرہ میں‌ہر طرف سے ہے اسلام کا وجود​

پھر آرہے ہیں مطلعِ تاریخ پر یہود​

​

وجہ سکوں شراب ہے اصل حیات سود​

جیسے یزید شام کا پھر دور آگیا​

​

یَا وَارِثَ الحُسَینِ تُنَا دِیکَ کَربَلا​

​

اک مصدرِ علوم شریعت تھا جو عراق​

اب اس کا گوشہ گوشہ ہے اک مرکز نفاق​

​

ہر صبح اک فساد ہے ہر شام افتراق​

بربادیوں کی زو پہ ہے روضہ شہید کا​

​

یَا وَارِثَ الحُسَینِ تُنَا دِیکَ کَربَلا​

​

نذر خزاں ہے سارا شریعت کا گلستاں​

محوِ سکوتِ مرگ ہیں امت کے پاسباں​

​

لکھے گا کون خون سے مذہب کی داستاں​

اب کوئی جان بنتِ پیمبر صلی اللہ علیہ وسلم نہیں رہا​

​

یَا وَارِثَ الحُسَینِ تُنَا دِیکَ کَربَلا​

​

مشرق میں جب سے رکھے ہیں شیطان نے قدم​

ایمان کا ہے وقار نہ کردار کا بھرم​

​

کاغذ کے بدلے بکتے ہیں بازار میں قلم​

ہر ہر قدم پہ ہوتا ہےسودا اصول کا​

​

یَا وَارِثَ الحُسَینِ تُنَا دِیکَ کَربَلا​

​

بے شرم ایسی امت بے دین ہوگئی​

جیسے کہ مر کے قابلِ تلقین ہوگئی​

​

رنگین خون سے ارضِ فلسطین ہوگئی​

اور شور ہے کہ دین کو خطرہ نہیں رہا​

​

یَا وَارِثَ الحُسَینِ تُنَا دِیکَ کَربَلا​

​

امت میں تاب شعلہ بیانی نہیں رہی​

اسلام کے لہو میں روانی نہیں رہی​

​

ایماں کی زندگی ہے جوانی نہیں رہی​

درکار عصر نو کو ہے اکبر علیہ السلام کا حوصلہ​

​

یَا وَارِثَ الحُسَینِ تُنَا دِیکَ کَربَلا​

​

اکاد خوش ہے کوئی خمینی نہیں ہے اب​

بغداد خوش ہے کوئی کلینی نہیں ہے اب​

​

بیداد خوش ہے کوئی حسینی نہیں ہے اب​

اب کوئی چارہ ساز نہیں آپ کے سوا​

​

یَا وَارِثَ الحُسَینِ تُنَا دِیکَ کَربَلا​

​

کیونکر نہ قلب دین و شریعت ہو داغ داغ​

اسلام کا مدینہ میں ملتا نہیں سراغ​

​

قبر رسول صلی اللہ علیہ وسلم پاک پہ جلتا نہیں چراغ​

ہے کون اب جو خون سے روشن کرے دیا​

​

یَا وَارِثَ الحُسَینِ تُنَا دِیکَ کَربَلا​

​

مولا کلیم عصر کی ہے بس یہ التجا​

دکھلا دو جلد جلوہء‌انوار مصطفی صلی اللہ علیہ وسلم ​

​

دیکھے جہاں جلال جگر بندِ مرتضی علیہ السلام​

ٹھہرے کہیں تو گریہء زہرا سلام اللہ علیہا کا سلسلہ​

​

یَا وَارِثَ الحُسَینِ تُنَا دِیکَ کَربَلا​

​

 

[شاہ حسین]

بہت خوب جناب کاشفی صاحب ۔ بہرین انتخاب ہے ۔

 

[کاشفی]

محمد وارث صاحب، شاہ حسین صاحب، فری صاحبہ، عمار عاصی صاحب، فرخ منظور صاحب، ظہور احمد سولنگی صاحب ۔ آپ تمام کا بیحد شکریہ۔۔خوش رہیں۔

 

[کاشفی]

یَا وَارِثَ الحُسَینِ تُنَا دِیکَ کَربَلا