یہ سبق شہر کے لڑکوں کو پڑھایا جائے - سلیم بیتاب

[محمد بلال اعظم]

یہ سبق شہر کے لڑکوں کو پڑھایا جائے​

اپنی ہر سوچ کو پاگل نہ بنایا جائے​

​

آشیاں اپنا ہی آجائے نہ اس کی زد میں​

دیکھ کر بحث کا طوفان اٹھایا جائے​

​

دیکھ کر اس کو نگاہیں نہ جھکائی جائیں​

اپنے احساس کو مجرم نہ بنایا جائے​

​

مجھ کو یوں ظلمتِ زنداں میں چھپانے والے​

میں ہو مجرم، تو مرا جرم بتایا جائے​

​

جی میں آتا ہے کہ یہ تجربہ بھی کر دیکھیں​

جیت کر اس کو پھر اک بار گنوایا جائے​

​

مدّتیں گزری ہیں دنیا سے جسے بھاگے ہوئے​

اب تو اس شخص کو خوابوں سے بلایا جائے​

​

دیدنی ہوتا ہے وہ لمحۂ سفاک کہ جب​

اپنے افکار کو سولی پہ چڑھایا جائے​

​

آپ کی ضد سے نہ بُجھ جائے چراغِ دانش​

سوچ کر فلسفی کو زہر پلایا جائے​

​

آج بیتابؔ فصیلوں کی ضرورت کیا ہے​

شہر کو شہر کے لوگوں سے بچایا جائے​

​

سلیم بیتابؔ​