آپ کے پسندیدہ اشعار!

[فرقان احمد]

محفلین اس لڑی میں اپنے پسندیدہ اشعار ارسال کر سکتے ہیں۔ شکریہ!

رات دن گردش میں ہیں سات آسماں
ہو رہے گا کچھ نہ کچھ، گھبرائیں کیا!

(غالب)

 

[طارق شاہ]

گر لاکھ بار آئے زمانہ بہار پر
ہر بار صدقے کیجیے رُخسارِ یار پر

آنے کا وعدہ اُن کے نہ آنے کی تھی دلیل
آخر کھُلی یہ بات بڑے انتظار پر

مست بنارسی

 

[طارق شاہ]

پھر جیب کو حوس ہے کہ ہو، یوں وہ تار تار
ممنُونِ بخیہ گر نہ طبیعت ہُوا کرے

پھر گرم آہِ شعلہ فشاں ہے دلِ حزیں
پھر گریہ چاہتا ہے کہ طُوفاں بَپا کرے

مست گیاوی

 

[طارق شاہ]

گیا رقِیب کے گھر بارہا شبِ وعدہ
بہت ذلیل مجھے تیری جستجو نے کیا

داغ دہلوی

 

[طارق شاہ]

مصرعِ سروْ سے لاکھوں ہی نکالوں شاخیں
باندھوں مضموں جو قدِ یار کی رعنائی کا

آتش

 

[عمراعظم]

واہ ۔۔ بہت خوب۔ طارق شاہ صاحب کے اشعار بھی لاجواب ہیں۔

 

[طارق شاہ]

بیگانگیِ خلق سے بے دل نہ ہو غالب!
کوئی نہیں تیرا تو مِری جان خدا ہے

غالب

 

[طارق شاہ]

کیا غَرَض ہے مِری تقدیر کو، مجھ سے پُوچھے
آبرو کا ہے طلب گار کہ رُسوائی کا

داغ دہلوی

 

[طارق شاہ]

دھیان آتے ہی اُلجھتی ہے طبیعت میری
زُلفِ شب گوں ہے کہ کافرشبِ فُرقت میری

سیّد شہاب الدین 'بے خود'

 

[طارق شاہ]

بلا کے شوخ ہیں، بے طرح کام کرتے ہیں
نظر مِلاتے ہی قصّہ تمام کرتے ہیں

اُٹھو اُٹھو درِ دولت سے عاشقو! اُٹّھو
چلو چلو کہ وہ دیدارعام کرتے ہیں

عبدالمجید بیدل

 

[طارق شاہ]

دُنیا میں حالِ آمد و رفتِ بشر نہ پُوچھ
بے اختیار آ کے رہا، بے خبر گیا

فانی بدایونی

 

[طارق شاہ]

پُرساں جو تِرے حُسن کے عالم کا ہے مجھ سے
مشتاق ہے موسیٰ سے تجلّی کے بَیاں کا

آتش

 

[طارق شاہ]

منظُورمجھے شکوۂ بیدادِ بُتاں ہے
لِلہ بتا دے کوئی الله کہاں ہے

اکبر الہ آبادی

 

[طارق شاہ]

دُشمنِ راحت، جوانی میں طبیعت ہو گئی
جس حَسِین سے مِل گئیں آنکھیں، محبت ہوگئی

اکبر الہ آبادی

 

[طارق شاہ]

بے فائدہ ہے توسنِ عمرِ رواں کی فکر
اے رشک! تم تو دیر سے، پا در رکاب ہو

رشک

 

[طارق شاہ]

عشق ایسا نہیں کچھ کھیل کے ہر اِک کھیلے
میں نے اڑسٹھ برس اس عمر میں پاپڑ بیلے

رنگین

 

[طارق شاہ]

کاش آپ وہ آئیں جو سُنیں ناز کی باتیں
قاصد سے ادا پاسُخِ پیغام نہ ہوگا

مومن

 

[طارق شاہ]

کب آنکھ اُٹھاتا ہُوں کہ آتے نہیں تیور
کب بیٹھ کے اُٹھتا ہوں کہ چکّرنہیں آتا

امیر

 

[طارق شاہ]

تسکین درد مندوں کو یا رب شتاب دے
دل کو ہمارے چین دے آنکھوں کو خواب دے

میر

 

[طارق شاہ]

تدبیر دوستوں کی مجھے نفع کیا کرے
بیماری اور کچھ ہے، کریں ہیں دوا کچھ اور

میر