جب چھان بورے والا آیا تو اسے چھان بورا دیتے ہوئے دیکھا، بیس بائیس سال کا نوجوان ایک بوری کاندھے پہ رکھے۔
ہائے ربا!یہ چھان بورا بوری میں ڈال کے لے جائے گا۔
"اگر آپ کو ایک ریڑھی لے کے دی جائے تو...؟"
"اماں جی! آنٹی جی! ۔۔۔وہ میں۔۔۔جی وہ۔۔۔ " خوشی کے مارے اسے سمجھ ہی نہیں آ رہی تھی کہ کیا کہے کیا نہ کہے۔ اور اس خوشی پہ دکھ کے مارے ہمیں سمجھ نہیں آ رہی تھی کہ کیا کہیں۔
پتہ چلا کہ یتیم ہے اور تین بہنوں کی شادی بھی کرنی ہے۔ وہی اکیلا آسرا ہے ماں بہنوں کا۔
سوچ رہی تھی کہ جب اسے ریڑھی ملے گی اور پہلے دن وہ اس پہ تکڑی اور بوری وغیرہ رکھ کے لے جائے گا۔پہلی گلی میں پہلی آواز لگائے گا تو اسے کس قدر خوشی ہو گی اور اس کے کیا تاثرات ہوں گے۔ مجھے ان تاثرات کو دیکھنے کا بے حد لالچ تھا۔
تیرہ ہزار کی ریڑھی اور سولہ سو کا خرچہ۔
اس کے چہرے اور پورے وجود میں سرخوشی کی لہریں۔۔۔ اللہ اکبر!
اللہ اسے اور اس کے پورے خاندان کو اور سب محنت کرنے کے شوقین لوگوں کو ڈھیروں خوشیاں اور آسانیاں عطا فرمائے۔ رزق حلال میں بے بہا برکتیں دے۔ آمین!
