آخرش کیا ہے رازِ بود و نبود

[La Alma]

آخرش کیا ہے رازِ بود و نبود
کھینچ کر دیکھیے عدم سے وجود ؟

بسکہ ہے ایک مشتِ خاک مگر
اس قدر آرزوئے نام و نمود

چارو ناچار کی تجارتِ حرف
راس آیا کوئی زیاں نہ ہی سود

رقص کرتا رہا شرارِ حیات
تا حدِ جاں، برنگِ موجہء دود

پوچھتے ہیں پلا کر جامِ خرد
ہے کوئی عقدہء جنوں کی کشود

ہائےالمٰی! قدر کی کوزہ گری
چاکِ ہستی پہ ڈھل رہا ہے جمود​

 

[فرقان احمد]

انسان کو انہی ازلی سوالات کا سامنا ہے اور آپ نے اپنے تئیں خوبصورتی کے ساتھ اپنے جذبات کو منظوم انداز میں پیش کیا ہے۔ تہذیبی رچاؤ کی حامل، خوب صورت لہجے میں کہی گئی ایک اور غزل ۔۔۔! بے پناہ داد ۔۔۔!

 

[فے کاف]

بسکہ ہے ایک مشتِ خاک مگر
اس قدر آرزوئے نام و نمود

بہت اچھے

ان لفظوں کا کیا مطلب ہے؟

نبود

موجہء دود

 

[محمد خلیل الرحمٰن]

بہت اچھے

ان لفظوں کا کیا مطلب ہے؟

بود و نبود مطلب ہونا نہ ہونا، ہستی کا وجود و عدم
موجہٗ دود مطلب دھوئیں کی لہر

 

[محمد خلیل الرحمٰن]

خوبصورت غزل۔ بہت سی داد

تا حدِ جاں

حد میں دال پر تشدید ہونی چاہیے شاید ۔ چیک کر لیجیے

 

[La Alma]

انسان کو انہی ازلی سوالات کا سامنا ہے اور آپ نے اپنے تئیں خوبصورتی کے ساتھ اپنے جذبات کو منظوم انداز میں پیش کیا ہے۔ تہذیبی رچاؤ کی حامل، خوب صورت لہجے میں کہی گئی ایک اور غزل ۔۔۔! بے پناہ داد ۔۔۔!

تشکر بسیار!!

 

[La Alma]

بہت اچھے

ان لفظوں کا کیا مطلب ہے؟

بہت شکریہ۔
نبود: نیستی، Non existence , Nihility
موجہء دود: دھواں ، غبار، یا دھند کی موج

 

[سید عاطف علی]

خوبصورت غزل۔ بہت سی داد
حد میں دال پر تشدید ہونی چاہیے شاید ۔ چیک کر لیجیے

ہوتی تو ہے ۔ لیکن قابل قبول لگتی ہے ۔
حد جاں تک۔ بھی کیا جاسکتا ہے۔
ویسے اضافت کے ساتھ مشدد ہی اولی ہے۔

 

[فے کاف]

آخرش

یہاں آخر سے بھی وہی مطلب بنتا ہے۔
آخرش کیا فارسی کا لفظ ہے؟
کہیں یاد کی بجائے یادش بھی پڑھا ہے۔

 

[La Alma]

خوبصورت غزل۔ بہت سی داد



حد میں دال پر تشدید ہونی چاہیے شاید ۔ چیک کر لیجیے

پسندیدگی کے لیے مشکور ہوں۔
درست نشان دہی کی ۔
اسے یوں کر لیتی ہوں
"حدِّ جاں تک، برنگِ موجہء دود "

 

[محمد وارث]

عمدہ غزل ہے بہت خوب!

 

[La Alma]

عمدہ غزل ہے بہت خوب!

بہت نوازش!

 

[محمد تابش صدیقی]

بہت عمدہ، لاجواب غزل۔

بسکہ ہے ایک مشتِ خاک مگر
اس قدر آرزوئے نام و نمود

 

[La Alma]

بہت عمدہ، لاجواب غزل۔

مشکور ہوں!!

 

[محمد ریحان قریشی]

بہت خوب۔

پوچھتے ہیں پلا کر جامِ خرد

'کر' کی جگہ 'کے' کا محل ہے۔

 

[عباس رضا]

آخرش کیا فارسی کا لفظ ہے؟
کہیں یاد کی بجائے یادش بھی پڑھا ہے۔

میرے خیال میں یہ ضمیر واحد غائب کی طرف اضافت ہے۔ لغوی معنیٰ ”اس کے آخر میں“ اور ”اس کی یاد۔“

 

[La Alma]

بہت خوب۔

'کر' کی جگہ 'کے' کا محل ہے۔

قدر کا درست تلفظ شاید د ساکن کے ساتھ قَدْرْ ہے۔ قضا ایک متبادل ہو سکتا ہے۔

نوازش!
" کر" ٹائپو ہے۔ درست "کے" ہی ہے۔ توجہ دلانے کے لیے بہت شکریہ۔
آپ نے مخمصے میں ڈال دیا۔ فیروز الغات کے مطابق "قدر " دال ساکن کے ساتھ بمعنی مرتبہ، توقیر اور
" قٙدٙر " بمعنی تقدیر ۔
یہاں قٙدٙر کو ہی برتا ہے۔

 

[سید عاطف علی]

نوازش!
" کر" ٹائپو ہے۔ درست "کے" ہی ہے۔ توجہ دلانے کے لیے بہت شکریہ۔
آپ نے مخمصے میں ڈال دیا۔ فیروز الغات کے مطابق "قدر " دال ساکن کے ساتھ بمعنی مرتبہ، توقیر اور
" قٙدٙر " بمعنی تقدیر ۔
یہاں قٙدٙر کو ہی برتا ہے۔

اردو میں تو شایدقدر دونوں طرح مقبول ہے۔

 

[محمد ریحان قریشی]

آپ نے مخمصے میں ڈال دیا۔ فیروز الغات کے مطابق "قدر " دال ساکن کے ساتھ بمعنی مرتبہ، توقیر اور
" قٙدٙر " بمعنی تقدیر ۔
یہاں قٙدٙر کو ہی برتا ہے۔

درست فرمایا، مجھے ہی مغالطہ ہوا۔ معذرت خواہ ہوں۔

 

[الف عین]

عمدہ غزل ہے ماشاء اللہ