جوش آنسو اور تلوار

[حسان خان]

کربلا کا گرم میداں، تمتماتا آفتاب​

کشمکش، ہلچل، تلاطم، شور، غوغا، اضطراب​

​

صورِ اسرافیل سے ملتا ہوا غوغائے جنگ​

برچھیاں، نیزے، کٹاریں، تیر، تلواریں، تفنگ​

​

غازیوں کا طنطنہ، بانگِ رجز کا دبدبہ​

طبل کی دوں دوں، کمانوں کے کڑکنے کی صدا​

​

آگ کی لپٹیں، شعاؤں کی تپش، گرمی کا زور​

اسلحہ کی کھڑکھڑاہت، لو کی رو، قرنا کا شور​

​

جنگ جو میدان میں تیغِ دو دم تولے ہوئے​

اہلِ ہمت دھوپ میں کالے علم کھولے ہوئے​

​

محفلِ باطل میں حق کی داستاں کہتا ہوا​

سرخ ذروں پر جوانوں کا لہو بہتا ہوا​

​

قلبِ اعداء پر حسین ابنِ علی کا رعب و داب​

قطرۂ بے مایۂ شبنم پہ گویا آفتاب​

​

رسم و راہِ حق سے ربط، آئینِ باطل سے عناد​

عہدِ جاں بازی، ۔(؟)۔ مردانگی، عزمِ جہاد​

​

شوقِ آزادی، خیالِ سرفروشی، ذوقِ مرگ​

یہ تھے انصارِ حسین ابنِ علی کے ساز و برگ​

​

تم بھی ہو منجملۂ انصارِ شاہِ کربلا​

سچ کہو ان میں سے تم کو کیا وراثت میں ملا​

​

چند اشکوں کے لطائف، چند شیون کے نکات​

کیوں، یہی لے دے کے ہے یارو! تمہاری کائنات​

​

اے عزیزو! اس بلا کی بے حسی کیا کیا علاج​

چند آہیں، اور وہ بھی بستۂ رسم و رواج​

​

ہاں ازل سے ہے یہ تقسیمِ وراثت کا اصول​

مرد کو دیتے ہیں شعلوں کی لپک، عورت کو پھول​

​

مرد کو ملتی ہے ترکے میں جھلکتی ذوالفقار​

عورتوں کو شاخِ گل کا لوچ، شبنم کا نکھار​

​

مرد کو ہوتا ہے حاصل فاتحانہ قہقہہ​

عورتوں کو ہچکیوں کی گونج، شیون کی صدا​

​

اے کہ تم پوشاکِ حربی کے عوض پہنے ہو 'گون'​

دل میں خود سوچو، تم اس تقسیم سے ہوتے ہو کون؟​

​

خیر اب تک جو بھی ہونا تھا عزیزو ہو چکا​

لیکن اب حق اہلِ جرات کو یہ دیتا ہے صدا​

​

جذبۂ مردانگی سے روٹھ کر منتا ہے کون​

حاملِ عزمِ شہیدِ کربلا بنتا ہے کون​

​

ناؤ اپنی خون کے دریا میں کھینے کے لیے​

کون بڑھتا ہے علی کی تیغ لینے کے لیے​

​

آج وہ ساونت آئے سامنے، جس کا شباب​

دے سکے شیبِ حبیب ابنِ مظاہر کا جواب​

​

کون ہے تم میں سے عبدِ خاصِ ربِ مشرقین​

کس کی نبضوں کو عطا ہو آتشِ خونِ حسین​

​

کون خوں اپنا بہا سکتا ہے پانی کی طرح​

کون مٹ سکتا ہے اکبر کی جوانی کی طرح​

​

کون سینے میں جلاتا ہے چراغ احساس کا​

کون کاندھے پر اٹھاتا ہے علم عباس کا​

​

آئے، تقلیدِ حسین ابنِ علی کرتا ہے کون​

کامل آزادی سے جینے کے لیے مرتا ہے کون​

​

کون میداں میں سنبھالے گا بصد شان و وقار​

سورما عباس کا پرچم، علی کی ذوالفقار​

​

مومنو! حق کی تمہیں سوگند ایماں کی قسم​

یہ صدا سن کر بڑھو کہتے ہوئے 'حاضر ہیں ہم'​

​

حکم دو تاریخ کو، دہرائے اپنی داستاں​

یہ نہیں ہمت، تو ہاتوں میں پہن لو چوڑیاں​

​

مرد و کب ہے بھنور سے جو ابھر سکتا نہیں​

حق ہی جینے کا نہیں اس کو جو مر سکتا نہیں​

​

(جوش ملیح آبادی)​

 

[سید زبیر]

سبحان اللہ
مومنو! حق کی تمہیں سوگند ایماں کی قسم
یہ صدا سن کر بڑھو کہتے ہوئے 'حاضر ہیں ہم'

جزاک اللہ