اب کے برس بھی

[الف نظامی]

اب کے برس بھی کیفیت میں ڈوبا رہے قلم
اب کے برس بھی وادی بطحا کے پھول دے

اب کے برس بھی رتجگے نعتوں کے کر عطا
اب کے برس بھی اذن ثنائے رسول دے

یارب ! فضائے جبر کا دامن ہو تار تار
آنگن میں عافیت کی ہوائے خنک چلے

یارب! حصار خوف سے نکلوں میں اس برس
یارب! برہنہ سر ہوں میں شام غضب ڈھلے

آسودگی کے پھول کھلیں شاخ شاخ پر
دامان آرزو میں ستارے کریں قیام

امن و اماں کی چاندنی دیوار و در پہ ہو
کرنیں ، گلاب چاندنی مجھ سے کریں کلام

جگنو ، سحاب ، تتلیاں ، خوشبو ، دھنک ، چراغ
اب کے برس بھی میرے شریک سفر رہیں

اترے فلک سے کہکشاں بھی بصد ادب
اشکوں میں بھیگتے مرے شام و سحر رہیں

یارب! تلاش رزق ثناء میں رہے خیال
مضمون نعت نوک قلم پر سجا رہے

دیوار و در درود پڑھیں ، ہر گھڑی پڑھیں
ذکر نبی کا گھر میں مرے رتجگا رہے

ہر لفظ کے ہو سر پہ عمامہ خلوص کا
مسند نشیں رہے مرے جذبوں کی داستاں

کلک ثناء چراغ جلائے ورق ورق
مجھ پر عروس شہر سخن بھی ہو مہرباں
ریاض حسین چودھری

 

[زونی]

آمین، بہت اچھی دعا ھے،بہت شکریہ۔

 

[فرخ منظور]

بہت ہی خوب نظامی صاحب!‌ بہت شکریہ!‌

 

[الشفاء]

اب کے برس بھی رتجگے نعتوں کے کر عطا
اب کے برس بھی اذن ثنائے رسول دے

واہ۔ سبحان اللہ۔۔۔

 

[ابو المیزاب اویس]

اب کے برس بھی ہونٹوں پہ انکی ثنا رہی
اب کے برس بھی وجد میں گھر کی فضا رہی
اب کے برس بھی مدح کے کھلتے رہے گلاب
اب کے برس بھی کشتِ دل و جاں سوا رہی
اب کے برس بھی لب پہ ترانہ تھا نعت کا
اب کے برس بھی چار سو مہکی صبا رہی
اب کے برس بھی شہرِ سخن میں تھیں رونقیں
اب کے برس بھی رقص میں میری صدا رہی
اب کے برس بھی شعر و سخن سے تھی دوستی
اب کے برس بھی دوستو حمد و ثنا رہی
اب کے برس بھی تذکرہِ مصطفٰے رہا
اب کے برس بھی گفتگو صل علٰی رہی