کاشفی
محفلین
اردو نثرپارہ
کاش!۔۔۔۔ ہم اپنوں سے جدا نہ ہوتے۔
(خوشی - پیاری رکن اردو محفل فورم)
کاش!۔۔۔۔ ہم اپنوں سے جدا نہ ہوتے۔
(خوشی - پیاری رکن اردو محفل فورم)
ہماری زندگی میں کبھی ایسا وقت بھی آتا ہے کہ لگتا ہے سب ٹھہر سا گیا ہے ۔سب کچھ ختم ہو گیا ہے۔ یہ سچ ہے کہ ہر انسان ایک جیسے واقعات ، حادثات، دکھ درد یا فرحت و انبساط پر ایک جیسے ردعمل کااظہار نہیںکرتا۔ کچھ لوگ اپنی داخلی کیفیت پر قابو نہیں رکھ پاتے۔اور اُن کا دکھ جگ ظاہر ہو جاتاہے ۔جب کہ دُنیا میں ایسے بھی لوگ ہیں جو اپنے دکھ کو اپنے اندر یپوست کر لیتے ہیں اور دوسروں کو حوصلہ دیتے نظر آتے ہیں ۔
اپنوں کی جدائی پر رونا جتنا آسان ہے اپنوں کی خوشی کے لئے ہنسنا اتنا ہی مشکل۔ ابا کہا کرتے تھے " میری یہ خوشی مشکل سےمشکل کام کر سکتی ہے "۔ شاید اسی لئے وہ جاتے جاتے مجھے اتنا مشکل کام دے گئے ۔
ہم اپنے ارد گرد لوگوں کو اس دنیا سے رخصت ہوتے دیکھتے ہیں ، سنتے ھیں اور اناللہ،،،،، کے بعد چند تسلی بخش اور رسمی جُملے " صبر کریں " یا" اللہ صبر دینے والا ہے " کہہ کر اپنا فرض اداکر دیتے ہیں۔مگر جب ہمارا کوئی اپنا پیارا ہم سے بچھڑتا ہے تو ہمیں احساس ہوتا ہے ۔" صبر کرو " کا یہ جملہ اس وقت کتنا تلخ لگتا ہے ۔ قدرت کے اس قانون کے آگے ہم بے بس ہو جاتے ہیں۔ اپنی محبت، پیار، چاہت ، دولت سب کے عوض بھی ہم جانے والے کو روک سکتے ہیں نہ واپس لا سکتے ہیں۔ دنیا کے بڑے سے بڑے خزانے بھی یہ سب نہیں کر سکتے ۔ یہ کیسی بے بسی ہے۔۔۔۔۔؟؟
خدا پر یقین رکھتے ہوئے ہمیں اس کی رضا میں ہی راضٰی ہونا پڑتا ہے۔ مگر کچھ رشتے ایسے ہوتے ہیں ، جن کی کمی تا عمر محسوس ہوتی ہے ۔ ان کا جاناایسا محسوس ہوتا ہے جیسے ابھی تھے ۔۔۔ ابھی اٹھ کرگئے ہوں ۔۔۔اور ابھی لوٹ آئیں گے۔ اپنے پیاروں کا جدا ہونااور اس جدائی کو برداشت کرنا دنیا کا مشکل ترین کام ہے۔
کاش ۔۔۔کبھی ایسا نہ ہوتا۔۔۔۔!!! کاش۔۔۔۔ ہم اپنوں سے جدا نہ ہوتے ۔کاش۔۔۔۔
مگر یہ کاش تو صرف کاش ہی ہے۔ اس کاش پر انسان کو اختیارنہیں۔
