انتخاب علامہ طالب جوہری

[نوید صادق]

جسم نے اپنی عمر گزاری سندھ کے ریگستانوں میں
دل کم بخت بڑا ضدی تھا، آخر تک پنجاب رہا

 

[نوید صادق]

مجھ کو مل پایا نہ کیوں اپنی ہی ہستی کا سراغ
آگہی میری چراغِ دستِ نابینا ہے کیا

 

[نوید صادق]

کبھی عتابِ بزرگاں کے خوف سے پیدا
گلی کے موڑ پہ بے وجہ تیزرفتاری

 

[نوید صادق]

یہ مرا مشکیزۂ بے آب، صحرا اور میں
جانتے ہیں پیاس کے آداب صحرا اور میں

یہ تو میں بھی جانتا ہوں، جس کا جو مقسوم ہے
ہو ہی جائے گا کبھی شاداب صحرا، اور میں؟

 

[نوید صادق]

غاروں کی دیواروں پر یہ تصویروں کا جال
بوڑھا ماضی ہانپ رہا ہے سرد گھپاؤں میں

 

[نوید صادق]

لفظوں کے گستاخ سفینے
سطحِ زباں پر ڈول رہے ہیں

جس مٹکے سے پیاس بجھائی
اس میں مٹی گھول رہے ہیں

 

[نوید صادق]

چاروں اور تھی جھوٹ کی برکھا سانچ کی آنچ ہمیں تک تھی
ہم بیساکھ کی دھوپ سے سلگے ساون کی ہریالی میں

 

[نوید صادق]

کہاں تک فلسفہ الفاظ کے آسیب سے بچتا
معانی ذہن کے اندر بھی حرف آلود ہوتے ہیں

 

[الف عین]

باز خوش آمدید نوید۔ لیکن یہ ایک ایک شعر ہی کیوں ہے؟ انتخاب کرتے وقت اگر مکمل غزلوں کا انتخاب کیا جاتا تو بہتر تھا جن کی برقی کتاب آسانی سے بن سکتی تھی۔

 

[نوید صادق]

کسی پیڑ کے سائے میں دھونی رما، کسی گھر میں نہ بن مہمان میاں
کوئی مکھڑا کھب گیا دل میں اگر، اسی ڈنک سے جائے گی جان میاں

نہ میں وارث شاہ نہ میر تقی، کشکول بدست گداگر ہوں
کچھ ادھر سے لیا کچھ اُدھر سے لیا، یوں ہی جمع کیا دیوان میاں

 

[نوید صادق]

کوئی معشوق ہے اس پردۂ زنگار کے پیچھے
کہ یہ ہنگامۂ تخلیق بے علت نہیں برپا

 

[نوید صادق]

دور افتادہ قصبے میں طالب ہم آباد ہوئے
ڈرے ہوئے تھے تہذیبوں سے، ڈسے ہوئے آگاہی کے

 

[نوید صادق]

اعجاز بھائی!
آداب!!
شکریہ،
بس زندگی کچھ اتنی مصروف اور مشکل ہوتی جاتی ہے کہ کئی دن حاضر نہ ہو سکا۔

ایک ایک شعر اس لئے کہ ہمیں پسند ہی یہی آئے۔طالب صاحب کمال کے شاعر ہیں۔ لیکن میری افتادِ طبع کہ میں نے بہت سے انتخاب کئے اور سب ایسے ہی کئے۔کسی بھی شعر کو کبھی رعائتی نمبر نہیں دئے کہ غزل پوری ہو سکے۔
باقی جو حکم ہو،
حاضر ہوں۔
نوید صادق

 

[نوید صادق]

ماضی کے ہر دور میں دنیا والوں کا دستور رہا
پیغمبر سے بیر نکالا، نفرت تھی پیغام کے ساتھ

کس لکڑی کا ماضی کیا تھا جلتا چولہا کیا جانے
اس سے پوچھو جس کا ربط ہو باغ کے قتلِ عام کے ساتھ

ترک و طلب کا ہم دونوں میں کب سے تصادم جاری ہے
اس کا نام لیا جاتا ہے اب تک میرے نام کے ساتھ

 

[نوید صادق]

بے مقصد پرواز سے تھک کر تتلی پھول پہ بیٹھ گئی
پھول تو اپنی جان سے ہارا تتلی بھی بدنام ہوئی

کوفے کے سارے دروازے آخر مجھ پر بند رہے
خوف زدہ گلیوں میں تنہا پھرتے پھرتے شام ہوئی

گاؤں کے پس منظر میں دن بھر چیخنے والی پن چکی
میرے کل کی خاطر اپنے آج میں بے آرام ہوئی

 

[نوید صادق]

کتنی بے آواز ہے دن میں نیستاں کی فضا
شب کی تاریکی میں لیکن کتنی پراسرار تھی

 

[نوید صادق]

شام ڈھلے منہ ڈھانپ کے سونا سورج کی مجبوری ہے
اپنی خوشی سے کون یہ چاہے اجلے دن کو رات کرے

 

[نوید صادق]

خلوتِ بے نشان میں پھول کھلے نشان کے
وحشتِ دل بھی سو گئی چادرِ ماہ تان کے

اپنے لباسِ جاں پہ بھی صاحبو ٹک نظر کرو
ہنستے رہو گے کب تلک ہم کو غریب جان کے

خلوتیانِ کنج ہوش تشنہ لبانِ یم بہ دوش
میرے حریف تھے مگر لوگ تھے آن بان کے

موج بہ موج یم بہ یم بادِ مراد ساتھ تھی
ناؤ سے رد نہ ہو سکے فیصلے بادبان کے

تیری گلی میں جاگ کر ہم نے بھی جُگ بتائے ہیں
ہم پہ بھی فاش ہوں کبھی رنگ ترے مکان کے

کیا وہ نگاہِ رنگ و بو گاؤں سے کوچ کر گئی
گنگ ہے نیم کا درخت خشک ہیں کھیت دھان کے

 

[نوید صادق]

لوگ اس طرح سے ملتے ہیں سرِ کوچۂ رزق
بڑھ کے تلوار سے جیسے کوئی تلوار ملے

 

[نوید صادق]

وہ مجھ پہ فاش ہوا کل کھلی کتاب کی طرح
اس اتفاق کو ذوقِ مطالعہ کہیے