انتخاب قابل اجمیری

[نوید صادق]

گرتے سنبھلتے جھومتے دارورسن کو چومتے
اہلِ جنوں تیرے حضور آ ہی گئے کشاں کشاں

 

[نوید صادق]

آؤ اب ایک نئے دور کا آغاز کریں
عہدِ رفتہ کی کوئی بات نہیں یاد مجھے

 

[نوید صادق]

عمر بھر ہم سمجھ سکے نہ تجھے
آج سمجھا رہی ہے تیری یاد

زندگی کتنی تیز رو ہے مگر
ساتھ ساتھ آ رہی ہے تیری یاد

 

[نوید صادق]

اے آفتابِ صبحِ بہاراں! سلام کر
دیوانے آ رہے ہیں شبِ غم گزار کے

 

[نوید صادق]

ہم تری راہ سے پھرے ہی نہیں
آستانے ہمیں بلاتے رہے

 

[نوید صادق]

کچھ غمِ زیست کے شکار ہوئے
کچھ مسیحا نے مار ڈالے ہیں

آخرِ شب کے ڈوبتے تارو!
ہم بھی کروٹ بدلنے والے ہیں

 

[نوید صادق]

خیالِ خاطرِ احباب اور کیا کرتے
جگر پہ زخم بھی کھائے شمار بھی نہ کیا

نجانے زندگی کیسے گذر گئی اے دوست
کہیں ٹھہر کے ترا انتظار بھی نہ کیا

 

[نوید صادق]

گھبرا کے نا خدا نے سفینہ ڈبو دیا
ہم مسکرا کے دامنِ طوفاں میں آ گئے

 

[نوید صادق]

زمانہ کھیل رہا ہے تمہاری زلفوں سے
ہمارے حالِ پریشاں کی بات کون کرے

 

[نوید صادق]

لذتِ گردشِ ایام وہی جانتے ہیں
جو کسی بات پہ اٹھ آئے ہیں میخانے سے

لوگ لے آتے ہیں کعبہ سے ہزاروں تحفے
ہم سے اک بت بھی نہ لایا گیا بت خانے سے

ظلمتِ دیر و حرم سے کوئی مایوس نہ ہو
اک نئی صبح ابھرنے کو ہے میخانے سے

 

[نوید صادق]

اب یہ عالم ہے کہ غم کی بھی خبر ہوتی نہیں
اشک بہہ جاتے ہیں لیکن آنکھ تر ہوتی نہیں

پھر کوئی کم بخت کشتی نذرِ طوفاں ہو گئی
ورنہ ساحل پر اداسی اس قدر ہوتی نہیں

 

[نوید صادق]

ہونٹوں پہ ہنسی آنکھ میں تاروں کی لڑی ہے
وحشت بڑے دلچسپ دوراہے پہ کھڑی ہے

آداب تری بزم کے جینے نہیں دیتے
دیوانوں کو جینے کی تمنا تو بڑی ہے

دل رسم و رہِ شوق سے مانوس تو ہو لے
تکمیلِ تمنا کے لئے عمر پڑی ہے

 

[نوید صادق]

ہم بے کسوں کی بزم میں آئے گا اور کون
آ بیٹھتی ہے گردشِ دوراں کبھی کبھی

 

[نوید صادق]

ہمسائیگی کاکل و رخسار چھن گئی
دن اپنا ہے نہ رات مگر جی رہے ہیں ہم

 

[نوید صادق]

ہاں ہوشیار، چشمِ فسوں کار ہوشیار
دل کو تری نگاہ کے انداز آ گئے

 

[نوید صادق]

عاشقوں کے جمگھٹے میں تیری بزمِ ناز تک
شمع بجھتے ہی بدل جاتا ہے پروانوں کا رُخ

کیا ہوا ہم کو اگر دو چار موجیں چھو گئیں
ہم نے بدلا ہے نہ جانے کتنے طوفانوں کا رخ

 

[نوید صادق]

ظلمت و نور میں تفریق ابھی مشکل ہے
رات سو رنگ بدلتی ہے سحر ہونے تک

 

[نوید صادق]

کسی کی زلف پریشاں کسی کا دامن چاک
جنوں کو لوگ تماشا بنائے پھرتے ہیں

قدم قدم پہ لیا انتقام دنیا نے
تجھی کو جیسے گلے سے لگائے پھرتے ہیں

 

[نوید صادق]

قابل اجمیری

اصلی نام: عبدالرحیم
قلمی نام: قابل اجمیری

پیدائش: 1930ء اجمیر شریف
وفات: 1962ء حیدر آباد ۔ پاکستان

کلام کی اشاعت

دیدہ بیدار ۔۔۔۔۔۔۔ پہلا مجموعہ کلام ۔۔۔۔۔۔۔۔۔ 1963ء
خونِ رگِ جاں ۔۔۔۔ دوسرا مجموعہ کلام ۔۔۔۔ 1966ء
کلیاتِ قابل ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 1992ء

 

[نوید صادق]

قابل کے کلام پر ہمعسروں کے تاثرات

قابل کے کلام سے ان کی انفرادیت نمایاں ہے اور یہی خصوصیت شاعر کے لئے اہم اور اہم تر ہے۔ میں نے جب پہلی بار ان کا کلام انہی کی زبانی سنا تو حقیقتا بہت متاثر ہوا، خیالات اور جذبات کے ساتھ ساتھ اسلوبِ بیان بھی شگفتہ و پاکیزہ اور تغزل کا حامل ہے۔

(جگر مراد آبادی)