اپنی ذات پر فخر و زعم کے اشعار

[جاسمن]

ہر ایک ذرّہ تھا گردش میں آسماں کی طرح
میں اپنا پاؤں زمیں پر جہاں بھی رکھتا تھا
عرفان صدیقی

 

[جاسمن]

وفا شناس ہیں، خوش دل ہیں، شعر کہتے ہیں
سو اس حساب سے تو تم پہ برتری ہے ہمیں

 

[جاسمن]

خدا نے چاہا تو سب انتظام کر دیں گے
غزل پہ آئے تو مطلع میں کام کر دیں گے

پڑے رہیں تو قلندر اٹھیں تو فتنہ ہیں
ہمیں جگایا تو نیندیں حرام کر دیں گے

تمہارے جیسے جئے اور کچھ نہیں کر پائے
ہمارے جیسے مرے بھی تو نام کر دیں گے

ہم آج بھی ہیں زمیں پر مگر یہی ڈر ہے
یہ تبصرے ہمیں عالی مقام کر دیں گے

تم ایک عمر سے تمہید لکھ رہے ہو شجاعؔ
ہم ایک لفظ میں قصہ تمام کر دیں گے

شجاع خاور

 

[شکیل احمد خان23]

اِس لڑی کا عنوان ’’اپنی ذات پر فخروزعم کے اشعار‘‘ ہوسکتا تھا۔ویسے موضوع کی مناسبت سے آپ کےتینوں مراسلوں کے اشعار میں خودنگری، خودبینی، خودپسندی ، خودپرستی اور جدھردیکھتا ہوں اُدھر میں ہی میں ہوں کی بہترین مثالیں موجود ہیں ،واہ!۔۔۔۔۔۔۔۔لیجیے شاعرانہ تعلّی کو بھی اِسی زُمرے میں شامل کرتے ہوئے میرتقی مؔیر کا یہ مشہور شعر نذر ہے:​

سارے عالم پر ہوں میں چھایا ہوا
مستند ۔ہے ۔میرا۔ فرمایا۔، ہوا
۔۔۔۔۔۔۔۔۔۔۔۔میرتقی مؔیر​

 

[جاسمن]

لڑی کا عنوان ’’اپنی ذات پر فخروزعم کے اشعار‘‘ ہوسکتا تھا

تکمیل شد

 

[یاسمین سکندر]

آپ اپنی تلاش کرتا ہوں
نقشِ فرضی میں رنگ بھرتا ہوں
گیان سنگھ شاطر

 

[یاسمین سکندر]

آباد ہیں یہ مجھ سے جہانِ خراب میں
میں ہی نہ ہوں تو فلک و فرش کس حساب میں
گیان سنگھ شاطر

 

[یاسمین سکندر]

میری ہستی ہے جستجوئے تمام
اِک یہی وصف مجھ میں کیا کم ہے
گیان سنگھ شاطر

 

[یاسمین سکندر]

میں نے عنوان دیا ہے ہر شے کو
زندگی کیا ہے؟مرا طرزِ بیاں
گیان سنگھ شاطر

 

[یاسمین سکندر]

شاطر نگاہِ شوق کا محرم ازل سے ہوں
آدم ہوں کوئی لالۂ صحرا نہیں ہوں میں
گیان سنگھ شاطر

 

[یاسمین سکندر]

پاتا ہوں اپنے پرتو ِہستی سے کم اُسے
گرمی تو ہے، شعور نہیں آفتاب میں
گیان سنگھ شاطر